Фарғонада тадбиркорларга нисбатан чиқарилган ноқонуний маъмурий қарорлар бекор қилинди

Айрим назорат қилувчи органлар тадбиркорларга нисбатан чора кўришда Маъмурий жавобгарлик тўғрисидаги кодекс талабларига амал қилмасдан, ваколат доирасидан четга чиқмоқдалар. Бу ҳақда Бизнес-омбудсман Абдуманноп Бўриев хабар берди.

Қайд қилинишича, Фарғона вилоятидаги айрим инспекцияларнинг мансабдор шахслари томонидан тадбиркорларга нисбатан расмийлаштирилган ҳужжатлар судларга юборилмасдан, ўзбошимчалик билан кўриб чиқилган ва жазо қўллаш тўғрисида қарорлар қабул қилинган. Бизнес-омбудсман томонидан киритилган хулосалар асосида 8 та ҳолатда йўл қўйилган қонун бузилишлари бартараф этилган ва инспекция томонидан ноқонуний чиқарилган маъмурий қарорлар бекор қилинган. Ишнинг бошқа тафсилотлари хабарда келтирилмаган.

Таъкидланишича, Маъмурий жавобгарлик тўғрисидаги кодекснинг 245-моддаси 3-бандида жиноят ишлари бўйича судлар якка тартибдаги тадбиркорлар ва (ёки) уларнинг ходимлари, юридик шахс бўлган тадбиркорлик субъектларининг мансабдор шахслари ва (ёки) бошқа ходимлари томонидан тадбиркорлик фаолиятини амалга ошириш чоғида содир этилган маъмурий ҳуқуқбузарликлар тўғрисидаги ишларни кўриб чиқиши белгиланган.

«Агар тадбиркорлик фаолиятингизга асоссиз аралашиш ёки ваколати бўлмаган органлар томонидан жазо чоралари қўллаш ҳолатига дуч келсангиз, Бизнес-омбудсманга мурожаат қилинг», дейилади хабарда.