Нукусдаги 4 қаватли уйда газ портлади

29 январ куни Қорақалпоғистоннинг Нукус шаҳридаги кўп қаватли уйда газ чақнаш ҳодисаси рўй берди. ФВВ матбуот хизмати хабарига кўра 2023 йилнинг 29 январ куни соат тахминан 16:15 ларда Нукус шаҳри Темир йўл маҳалласи 22 кичик туман 8/1-уйнинг 4-қаватида жойлашган хонадонларнинг бирида газ ва ҳаво аралашмасининг чақнаши туфайли портлаш содир бўлган. 

Қорақалпоғистон Соғлиқни сақлаш вазирлиги хабарига кўра, чақнаш оқибатида 2003 йилда туғилган С.Ш. ҳамда 2004 йилда туғилган З.А. куйиш жароҳати олган.

Республика тезкор штаби ҳодиса юзасидан батафсил маълумот берди. Унга кўра, уйдаги бир нечта хонадоннинг том ва пол қисмлари ўпирилиб, 4-қаватдан 1-қаватгача тушиб кетган. Ҳодиса оқибатида жароҳатланганлар зудлик билан Республика шошилинч тиббий ёрдам илмий маркази Қорақалпоғистон Республикаси филиалига ётқизилган. 

«Ушбу воқеа юзасидан Тезкор штаб тузилган ва унинг бошчилигида бахтсиз ҳодиса содир бўлган уйда қидирув-қутқарув ишлари олиб борилмоқда, шу жумладан ушбу уйда яшовчи фуқаролар хатловдан ўтказилиб, ўпирилган том ва пол қисмлари остида фуқаролар бор-йўқлигига аниқлик киритиш бўйича чоралар кўрилмоқда. 

Шунингдек, ушбу уйда яшаб келаётган қолган фуқаролар эвакуация қилиниб, вақтинчалик уй-жой ва уч маҳал иссиқ овқат билан таъминланди», дейилади хабарда.

Ҳозирда терговга қадар текширув ҳаракатлари олиб борилмоқда. Воқеа юзасидан қўшимча маълумот тақдим этилади.