Франция ва Австралия биргаликда Украина учун снарядлар ишлаб чиқаради

Франция ва Австралия Украина учун биргаликда бир неча минг 155 мм артиллерия снарядларини ишлаб чиқаришга келишиб олди. Бу ҳақда 30 январь куни Франция мудофаа вазири Себастьен Лекорню Парижда икки давлат ташқи ишлар вазирлари ва мудофаа идоралари учрашуви якунлари бўйича ўтказилган матбуот анжуманида маълум қилди.

Лекорнюнинг сўзларига кўра, французнинг Nexter қурол компанияси снарядни тўғридан тўғри ишлаб чиқариш билан шуғулланади ва бунинг учун зарур порохни Австралия етказиб беради. Ишлаб чиқариш харажатлари ҳам икки давлат ўртасида тақсимланади.

Франция Мудофаа вазирлиги раҳбари ҳамкорлик бўйича эришилган келишувни «мисли кўрилмаган» деб атади. Унинг австралиялик ҳамкасби Ричард Марлес қўшимча қилди: «Бу Франция ва Австралия Украинага у бу можарога бардош бера олиши ва уни ўз шартлари асосида якунлаши учун кўрсатаётган доимий ёрдам даражасининг бир қисмидир».

Шу куни Франция президенти Эммануэл Макрон ҳам Париж Киевни Ғарб қирувчи самолётлари билан таъминлаши мумкинлигини истисно этмади. Ҳаагада Нидерландия бош вазири Марк Рютте билан учрашувдан сўнг Макрон: «Ҳеч нарса рад этилмаяпти», деди. Шу билан бирга, Франция президенти Украина биринчи навбатда қирувчи самолётлар етказиб бериш бўйича расмий сўров юбориши кераклигини қўшимча қилди – Париж ҳали уни олмаган.

Макрон, шунингдек, Ғарб томонидан тақдим этилган қуроллар «можароларни кучайтириш» ва Россия Федерацияси ҳудудига ҳужумлар уюштириш учун эмас, балки фақат Украинани Россия агрессиясидан ҳимоя қилиш учун ишлатилиши кераклигини таъкидлади. Франция президенти яна бир шартни ҳам айтиб ўтди: Киевга қурол етказиб бериш Франция қуролли кучларининг жанговар имкониятларини камайтирмаслиги керак.

Рютте, ўз навбатида, Макроннинг мезонларига рози бўлди. Нидерландия бош вазири, шунингдек, Украинага қирувчи самолётлар етказиб бериш бўйича «тақиқ» йўқлигини ва бу «олдинга катта қадам» бўлишини айтди. Шу билан бирга, Рюттенинг сўзларига кўра, Нидерландия ҳукумати ҳам Киевдан тегишли сўров олмаган.