АҚШ Ўзбекистонга электромобиллар ишлаб чиқаришда кўмаклашади

Ўзбекистоннинг АҚШдаги элчиси Жавлон Ваҳобов Калифорния штатининг Манҳеттен-Бич ва Эл-Сегундо шаҳарлари мэрлари Ричард Монтгомери ва Дрю Бойлс билан учрашди, деб хабар бермоқда «Дунё».

Фото: iStock

Учрашувда Калифорния штатининг Манҳеттен-Бич мэри Ричард Монтгомери кинематография соҳасидаги Ўзбекистон компаниялари ва ўз шаҳридаги шу каби фирмалар билан, хусусан, Manhattan Beach Studios (видео ишлаб чиқариш хизмати) ўртасида ҳамкорлик алоқаларини ўрнатишга кўмаклашишга тайёр эканини маълум қилди.

Калифорния штатининг Эл-Сегундо шаҳари мэри Дрю Бойлснинг айтишича, у бошқараётган шаҳарда Fortune 500 рўйхатидаги ўнлаб компанияларининг офислари жойлашган бўлиб, шаҳар дунёнинг аэрокосмик пойтахти сифатида тан олингани, биофан, ахборот технологиялари, энергетика каби фирмаларни ўз ичига олганини айтди.

Суҳбат чоғида Америка томонидан Ўзбекистон компаниялари билан электромобиллар ишлаб чиқариш, космик ва бошқа соҳаларда ҳамкорлик алоқаларини ўрнатишда кўмаклашишга ҳозирлик билдирилди. «Мен мамлакатингиз автомобиль саноати ва унинг бу борадаги салоҳияти, Ўзбекистон расмийларининг мамлакатда экологик тоза транспортни жорий этиш борасидаги саъй-ҳаракатлари билан танишман, Ўзбекистон ҳукумати билан бу йўналишда ҳамкорлик қилишни истар эдим», деди Дрю Бойлс.

Учрашув якунида АҚШнинг Калифорния штати шаҳарлари мэрлари билан саноатнинг турли соҳаларида ўзаро алоқаларни давом эттириш, икки давлат вакилларининг бир қатор онлайн музокаралари ва ташрифларини ташкил этишга келишиб олинди.