Оиланинг 3 нафар аъзоси эса номаълум этиологик заҳарланиш ташхиси билан шифохонага ётқизилган.
17 феврал куни Тошкент вилояти Оққўрғон туманининг Бирлик маҳалласида яшовчи оилада оммавий равишда овқатдан заҳарланиш ҳолати содир бўлди. Бу ҳақда туман ИИБга ўша куни соат 14:30ларда хабар келиб тушган.
Kun.uz манбасига кўра, бир оиланинг 3 нафар аъзоси воқеа жойида, яна бир аъзоси эса шифохонада вафот этган.
Воқеа жойини кўздан кечириш давомида экспертиза текшируви учун қовурилган балиқ ва мошкичири овқати қолдиқлари, помидор ва бодрингдан тайёрланган тузлама, компот ҳамда бошқа озиқ-овқат маҳсулотларидан намуналар олинган.
Суд-тиббиёт экспертизасининг дастлабки маълумотномасига кўра, фуқаролар ўлимига номаълум этиологияли овқатдан заҳарланиш сабаб бўлган.
Олдинроқ Самарқандда уй шароитида тайёрланган консерва маҳсулотларини истеъмол қилиш оқибатида 2 киши вафот этганди.
