Жангсиз чемпионлик. Озар, арман, қозоқ боксчиси Жалоловга қарши рингга чиқишдан нега бош тортди?
«Кичик жаҳон чемпионати» дея эътироф этиладиган Странжа-2023 турнирида боксда камдан кам учрайдиган ҳолат юз берди. Вазн тоифалар орасида барчанинг диққат-эътибори қаратиладиган энг оғир вазнли боксчилар ўртасидаги жангларда кетма-кет уч нафар чарм қўлқоп устаси Баҳодир Жалоловга қарши рингга кўтарилишдан бош тортди.
![](https://storage.kun.uz/source/9/42ZRoBAjiMCuanREY0vjF9IFhQ8DJDNm.jpg)
Фото: Getty Images
Тўлқин Қиличев бош мураббийлигидаги бокс бўйича Ўзбекистон миллий жамоаси 74-бор ташкил этилган Болгариядаги мусобақада 7та олтин, 5та кумуш ва 6та бронза, жами 18та медаль жамғаришга эришди. Бу натижа эса Ўзбекистонга умумжамоа ҳисобида 1-ўринни тақдим этди. Шу тариқа, вакилларимиз Софиядаги «кичик жаҳон чемпионатида» кетма-кет иккинчи йил тенгсиз эканликларини кўрсатишди.
![](https://storage.kun.uz/source/9/ctaSRPVvtQCDMTTIMOaavJRTQI13M6X1.jpg)
Болгария пойтахтидаги турнирда барчанинг диққат марказида турган +92 кг вазн тоифасидаги боксчилар ўртасидаги жанглар кутилган шиддатни тақдим эта олмади. Бунга рақибларнинг Баҳодир Жалоловга қарши рингга чиқишдан бош тортгани сабаб бўлди.
Бир ғалаба билан чемпионлик
«Big Uzbek» номи билан машҳур ўзбекистонлик оғир вазнли боксчи Болгариядаги турнирнинг 1/8 финалида америкалик Жошуа Эдвардсни мағлубиятга (5:0) учратгач, чоракфиналда принципиал рақиби қозоғистонлик Камшибек Конкабаевга қарши рингга кўтарилиши керак эди. Аммо 2019 йилги жаҳон чемпионатида Баҳодирга мағлубиятга учраган қозоқ боксчиси маълум сабабларга кўра жангни бекор қилгач, Жалолов яримфиналга йўлланма олди.
Яримфиналда эса озарбойжонлик Муҳаммад Абдуллаев ўзбек боксчисига қарши жанг қилиши лозим эди. Аммо Токио-2020 нимчоракфиналида Баҳодирдан қақшатқич зарбага учраган Абдуллаев ўша мағлубиятни унутмаган экан – у ҳам муддат аввал «рингга оқ сочиқ ташлади».
![](https://storage.kun.uz/source/9/c1ZS3vQ9PkIzlFsIuNzFGl6fmmvJTgiO.jpg)
Ниҳоят, финалда жаҳоннинг вице-чемпиони, супероғир вазнли Давид Чалоян Баҳодир Жалоловга қарши жанг қилиши кутилганди. Аммо финалгача ғалабалар билан етиб келган арманистонлик чарм қўлқоп устаси Токио-2020 Олимпиадаси ғолибига қарши жангдан бош тортиб, курашсиз кумуш медалини афзал билди. 28 ёшли ўзбекистонлик боксчи турнир тарихида илк марта кетма-кет 3та жангсиз олтин медалга эга чиқди.
Рақиблар жанг қилишдан нега бош тортди?
Супероғир вазн тоифасида Баҳодир Жалоловга қарши рингга кўтарилишни истамаган боксчиларнинг мураббийлари буни турлича изоҳлаган.
Хусусан, Қозоғистон миллий жамоаси бош мураббийи Мирзагали Айтжанов sports.kz сайтига шогирдининг жангга чиқмаганини изоҳлар экан, буни қўрқоқлик эмас, жароҳат билан боғлади.
«Камшибек Конкабаевнинг қўлида жароҳат бор эди. Ўзингиз яхши биласиз, энг кучли боксчига қарши жангда бу муҳим рол ўйнайди. Шунинг учун Жалоловга қарши жангда боксчимизнинг соғлиги борасида таваккал қилмасликка қарор қилдик. Камшибек ҳали бошқа турнирларда ўзининг кучини исботлайди», - деди мураббий.
Давид Чалояннинг финалга чиқишни рад этгани борасида Арманистон миллий жамоаси устози Карен Агамалян Sportnews нашрига фикрини билдирар экан, бу мураббий ҳам шогирдининг ўзбек боксчисига қарши жанг қилмагани сабабини жароҳат билан боғлаган.
![](https://storage.kun.uz/source/9/hf4nyYeaQDbhUV-EOMqi4x7QFBQP1oQO.jpg)
Дарвоқе, Конкабаевнинг Жалолов билан жангни бекор қилганидан кўп ўтмай, Бутунжаҳон бокс ассоциацияси (WBA) супероғир вазнли боксчилар рейтингини эълон қилиб, Конкабаевни рейтингдан чиқарди. Қозоқ боксчиси январь ойида рўйхатда 4-ўринни эгаллаб турган бўлса-да, бир йилдан буён профи боксда жанг қилмагани сабабли рейтингдан чиқарилган. Жалолов эса 15-ўринда бормоқда.
«Баҳодирнинг рақиблари очиқчасига қўрқиб, рингга чиқмаяпти»
Ўзбекистон миллий жамоаси бош мураббийи Тўлқин Қиличевнинг Tribuna.uz билан суҳбатда айтишича, рақибларнинг Жалоловга қарши рингга кўтарилишни истамаётгани сабаби, уларнинг соғлиғи билан таваккал қилишни истамаётганидир.
«Ўзбек боксидаги муваффақиятлар – президентимизнинг боксни ривожлантириш ва қўллаб-қувватлашга доир чиқарган қарорлари маҳсулидир. Бу бизга жуда кучли туртки бўлди.
![](https://storage.kun.uz/source/9/ndV3VYPSVSl0qybKR0oRzxZ95TuCC-Ex.jpg)
Баҳодирнинг чемпионлиги ҳақида гапирадиган бўлсам, унинг рақиблари очиқчасига қўрқиб, боксчимизга қарши рингга чиқмаяпти. Чунки Баҳодир айни дамда ҳаваскорлар ўртасида дунёда биринчи рақамли боксчи. Профессионал боксда ҳам Жалолов жаҳон чемпионлиги учун энг умидлиси бўлиб турибди. Рақибларнинг унга қарши жанг қилишни истамаётганининг ягона сабаби – ўз соғлиғига зарар етмаслигининг олдини олишдир. Чунки бунинг эҳтимоли катта эди. Баҳодир улардан яққол устун. Буни унинг рақиблари ҳам яхши билади. Яъни унга қарши жанг қилиб ғалабадан умид қилиб бўлмайди», - дейди Тўлқин Қиличев Tribuna.uz мухбири билан суҳбатда.
Усмон Ибодов
Мавзуга оид
![](https://storage.kun.uz/source/thumbnails/_medium/10/icT7Z81gIxfTtu5pSxbaN_G-i4nsWbMG_medium.jpg)
09:00 / 21.08.2024
Уришқоқ боладан олимпиада чемпионлигигача — Асадхўжа Мўйдинхўжаев хонадонидан репортаж
![](https://storage.kun.uz/source/thumbnails/_medium/10/gt6iYtgFZHftglJU0bAuMW_WmDrMjv3g_medium.jpg)
18:29 / 16.08.2024
ХОҚ ва IBA «жанги»: Бокс Лос-Анжелес-2028 Олимпиадасидан ўрин олмайдими?
![](https://storage.kun.uz/source/thumbnails/_medium/10/eC5hnhg29-QJ98WyH43PG2_i-zsXPKby_medium.jpg)
09:05 / 16.08.2024
Лоғондан Парижга йўл — футболчи бўлишни орзу қилиб, боксда Олимпиада чемпиони бўлган Лазизбек Мулложонов уйидан репортаж
![](https://storage.kun.uz/source/thumbnails/_medium/10/hbhMBnW5lWd0D_LtohlnqfqEqMdBbmNa_medium.jpg)
16:46 / 15.08.2024