2022 йилда АҚШдан Европа Иттифоқига суюлтирилган газ экспорти 2,5 баробар ошди

2022 йилда АҚШдан Европага суюлтирилган газ экспорти 2,5 баробарга ошиб, 117,4 миллион кубометрни ташкил қилди, дейилади Оқ уйдаги Иқтисодий маслаҳатчилар кенгашининг 21 март, сешанба куни эълон қилинган ҳисоботида. 

Қўшма Штатлар ўтган йили Европага 47,8 миллион кубометр суюлтирилган газ экспорт қилган ва бу кескин ўсиш Россиянинг Украинага бостириб кириши билан боғлиқ, деб ёзади ҳисобот муаллифлари. «АҚШдан суюлтирилган газ ва хом нефть экспорти 2021 йилдаги даражадан сезиларли ошди. Суюлтирилган газ бўйича, АҚШ экспорти Европа мамлакатларига ҳам кескин ўзгарди, чунки Россия ўзининг бир вақтлар ҳукмрон бўлган табиий газ таъминотини қисқартирди», дейилади ҳисоботда. 

2022 йил охирида Европа Иттифоқи Хитой, Япония ва Жанубий Кореяни ортда қолдириб, дунёда суюлтирилган газнинг асосий харидорига айланди, деб ёзади Financial Times январь ойида. Халқаро энергетика агентлигининг таъкидлашича, ўтган йилнинг июнь ойида АҚШдан суюлтирилган газ етказиб бериш биринчи марта «Газпром»нинг Европага экспорти ҳажмидан ошиб кетди. Ноябрь ойида Давлат департаменти Европага экспорт Америка компаниялари томонидан барча таъминотнинг 70 фоизини ташкил қилганини таъкидлади.  

2023 йил январь ойида АҚШдан суюлтирилган газнинг биринчи партияси Германияга – Қуйи Саксониядаги Вильхельмсхафенев янги сузувчи терминалига етиб келди, у ўтган йилнинг декабрь ойида бир қатор шунга ўхшаш объектлар билан бирга очилганди.

Россиянинг Украинага бостириб кириши ва Россиядан табиий газ етказиб берилиши тўхтатилиши фонида Германия ҳукумати суюлтирилган газ импорти учун инфратузилма яратишни тезлаштирди. Шлезвиг-Гольштейндаги Брунсбюттеледа яна бир терминал очилди. Бундан ташқари, Любминда яна бир хусусий лойиҳа фойдаланишга топширилди. 

Март ойида Германия канцлери Олаф Шольц CNN телеканалига берган интервьюсида Германия Россиядан газ, кўмир ва нефть етказиб беришдан мустақил бўлганини айтди. «Бир йил аввал биз Россиядан Германияга ва Европанинг кўплаб қисмларига газ етказиб берилмайдиган вазиятга иқтисодий жиҳатдан осонлик билан бардош бера оламиз деб ҳеч ким кутмаган эди, лекин биз буни Ғарбий Европа орқали суюлтирилган газ етказиб беришни кўпайтириш, Германиянинг шимолий қирғоғида янги портлар қуриш орқали амалга оширдик», деди Шольц.