ЕИ Путиннинг ядро қуроли ҳақидаги баёнотига Минск реакциясини кутяпти

27 март, душанба куни Брюсселда бўлиб ўтган брифингда Европа Иттифоқи ташқи ишлар хизмати матбуот котиби Петер Станонинг маълум қилишича, Россиянинг Беларусда тактик ядро қуролини жойлаштириши «янада кескинлашув ва Европа хавфсизлигига тўғридан тўғри таҳдид бўлади». «Биз Беларус томонидан бу кун тартибида эканлиги ёки содир бўлиши борасида тасдиқловни кўрмадик. Лекин бу содир бўладиган бўлса, албатта, оқибатлари ҳам бўлади», - деди у. 

Стано Россия президенти Владимир Путиннинг баёнотига «бу шафқатсиз ноқонуний тажовузга аллақачон шерик бўлган» Александр Лукашенко режимининг муносабатини кутишга чақирди. 

Бунгача Европа Иттифоқи бош дипломати Жозеп Боррел, агар Москва Беларус ҳудудига тактик ядро қуролини жойлаштирса, Брюссел янги санкциялар жорий этишга тайёрлиги ҳақида огоҳлантирган эди. «Беларус ҳали буни тўхтата олади, бу уларнинг танлови», — деб ёзди у Twitter’да. 

Петер Стано брифингда бундай ҳаракат ЕИ мамлакатлари томонидан жавобсиз қолмаслигини тасдиқлади, лекин санкцияларни ЕИ Кенгаши томонидан қабул қилинишидан олдин муҳокама этишдан бош тортди, чунки бу тартиб қатъий махфий ҳисобланади. 

«Биз ҳар қандай сценарийга тайёрмиз ва можаро авж олгани сари бу тайёргарликларни (санкцияларни) кўриб чиқамиз. Санкция бўйича ҳар бир қарор аниқ воқеалар билан боғлиқ. Шу тариқа, улар, албатта, янги ўзгаришлар ва кескинлашувларни ҳисобга олади ҳамда шунга мос равишда мослаштирилади», дея аниқлик киритди Петер Стано. 

Ҳозир Европа Иттифоқи давлатлари февраль ойида Европа комиссияси томонидан таклиф этилган Беларусдаги режимга қарши янги санкциялар пакетини кўриб чиқмоқда.