«Қатаргейт» иштирокчиси қамоқхонадан уй қамоғига ўтказилади

Пьер Антонио Панцери Европа парламентидаги коррупция можаросини тергов қилишда ёрдам тўғрисида ваъда бериб, тергов билан келишувга эришди. Бунинг эвазига унга енгилроқ жазо ваъда қилинган.

Пьер Антонио Панцери / Фото: AFP

Европарламентда «Қатаргейт» номини олган коррупция можаросида асосий гумонланувчилардан бири Пьер Антонио Панцери тез орада қамоқхонадан уй қамоғига ўтказилади. Бу ҳақда 6 апрель, пайшанба куни Панцерининг адвокати Лоран Кеннес журналистларга маълум қилди. Унга кўра, Европарламентнинг собиқ депутати бўлган 67 ёшли италиялик судгача электрон билагузук билан уйда сақланади.

Панцери январь ойида Бельгия прокуратураси билан келишувга эришиб, тергов билан тўлиқ ҳамкорлик қилишга ва можаро терговига ҳисса қўшишга ваъда берди. Натижада, унга қисқартирилган жазо берилиши мумкин.

Европарламентдаги коррупция можароси ўтган йилнинг декабрь ойида бошланган. ЕП вице-президенти Ева Кайли ва бир неча депутатлар унинг иштирокчисига айланди. Бельгия прокуратураси Қатар ва Марокаш улар орқали «катта миқдорда пул ва совғалар ёрдамида Европарламент қарорларига таъсир ўтказишга» уринганликда гумон қилмоқда. Ҳар икки давлат ҳам барча айбловларни рад этди. Можарони тергов қилиш жараёнида Бельгия расмийлари 1,5 миллион евро нақд пулни мусодара қилган.