Швецияда россиялик аёл жосусликда гумонланиб қўлга олинди

Гётебургдаги нефтни қайта ишлаш заводида ишлаган россиялик аёл қўлга олинди. У саноат жосуслигида гумон қилинмоқда.

Фото: AA

Швециянинг Гётебург шаҳрида Россия фуқароси саноат жосуслигида гумонланиб қўлга олинди. Бу ҳақда 14 апрель, жума куни Швециянинг TV4 телеканали хабар берди.

Қўлга олиш пайшанба куни россиялик аёл ишлаган Preem нефтни қайта ишлаш заводида амалга оширилди. Телеканал маълумотларига кўра, иш бўйича тинтув ўтказилган ва бир неча киши сўроқ қилинган — аниқроқ тафсилотлар йўқ. Телеканал манбаларининг таъкидлашича, қўлга олиш саноат жосуслигидаги гумонлар бўйича амалга оширилган.

Россиянинг Украинага кенг кўламли бостириб киришидан кейин Финландия, Швеция ва Норвегияда рус разведкасига қарши кураш кучайди. Январь ойида Швеция суди икки ака-укани Россия фойдасига жосуслик қилганликда айбдор деб топди. Улардан бирига умрбод, иккинчисига 9 йил-у 10 ой қамоқ жазоси тайинланди.

Норвегия Ташқи ишлар вазирлиги 13 апрель куни Россия элчихонасининг «дипломатик мақомга тўғри келмайдиган фаолият» билан шуғулланган 15 нафар ходимини мамлакатдан чиқариб юбораётганини маълум қилди. Финландия 4 апрелда НАТОга қўшилди. НАТОга кириш тартиби Швеция томонидан ҳам давом эттирилмоқда.