Apple iPhone 16 Pro ва Pro Max экрани ўлчамини оширади

Янгилик 2024 йилда жорий этилиши мумкин.

Display Supply Chain Consultants компаниясининг таниқли инсайдери ва таҳлилчиси Росс Янг сўзларига кўра, 2024 йилда тақдим этиладиган iPhone 16 Pro ва iPhone 16 Pro Max моделлари мос равишда 6,3 ва 6,9 дюйм диагоналли дисплей билан жиҳозланади.

Демак, келаси йилги флагманлар iPhone тарихидаги энг катта смартфон бўлади. Таққослаш учун, ҳозирги iPhone 14 Pro ва iPhone 14 Pro Max 6,1 ва 6,7 дюймли дисплейга эга. 2023 йил кузида тақдим этиладиган янги авлод смартфонларида бу ўлчам ўзгармайди.

Шунингдек, инсайдернинг қўшимча қилишича, Apple компанияси iPhone 16 Pro ва Pro Max экранларининг томонлар нисбатини бироз ўзгартириши, яъни улар бироз кенгайиши ёки чўзилиши мумкин. Ҳозирча бу ҳақда тафсилотлар йўқ. Янг май ойининг охирида батафсил маълумот алмашишга ваъда берди.

Росс Янг таҳлилчи сифатида яхши обрўга эга ва унинг инсайдлари деярли ҳар доим тасдиқланган.

#iPhone #Apple #технологиялар