Германияда «рейхсбюргерлар»га алоқадор яна 3 киши қўлга олинди

Қўлга олинганлар Рейс зодагонлари оиласидан бўлган шаҳзода бошчилигидаги террорчилик тармоғига алоқадор экани тахмин қилинмоқда. Учаласи ҳам террорчилик гуруҳига алоқадорликда гумонланмоқда.

Фото: AP

Германия Федерал жиноий ишлар бошқармаси (BKA) ходимлари 22 май, душанба куни кечқурун Рейс зодагонларидан бўлган франкфуртлик тадбиркор Генрих XIII бошчилигидаги «рейхсбюргерлар» гуруҳига алоқадорликда гумон қилинган икки эркак ва бир аёлни қўлга олишди. Бу ҳақда Карлсруэдаги Федерал прокуратура 23 май куни эълон қилди.

Қўлга олинган Йоханна Ф.-Й. ва Ҳанс-Йоахим Х. Баден-Вюртемберг федерал еридан, Штеффен В. эса Қуйи Саксониядан, дея аниқлик киритди идора. Учаласи ҳам террорчилик гуруҳига алоқадорликда гумон қилинмоқда.

Штеффен В. бир кун олдин судга келтирилди ва ҳибсга олинди. Яна икки нафар қўлга олинганларнинг эҳтиёт чораси 23 май куни эълон қилинади.

Рейс шаҳзодаси, тергов маълумотларига кўра, Германияда ҳарбий куч ишлатиш ва демократик тузумни бекор қилиш орқали давлат тўнтаришини режалаштирган «рейхсбюргерлар» экстремистик гуруҳининг етакчиси деб ҳисобланади.

17 май куни Германияда ҳокимиятни зўравонлик йўли билан эгаллашни режалаштирганликда ва Германия соғлиқни сақлаш вазири Карл Лаутербахни ўғирлаб кетишда гумон қилинаётган «рейхсбургерлар» устидан суд жараёни Кобленц олий минтақавий судида бошланганди.

44 ёшдан 56 ёшгача бўлган тўрт нафар эркак ва 75 ёшли аёл террорчи ташкилот тузиш ёки унда қатнашиш, шунингдек, федерал ҳукуматга қарши ҳаракатларга тайёргарлик кўришда айбланмоқда.

Суднинг биринчи кунида айблов хулосаси ўқилди. 2022 йил апрелида тўрт нафар эркак, октябр ойида тергов томонидан гуруҳ раҳбари деб ҳисобланган аёл қўлга олинган. Уларнинг барчаси ҳибсда.

Федерал прокурорларга кўра, фитначилар ҳукуматни ағдариш бўйича уч босқичли режа ишлаб чиққан. Биринчи қадам сифатида Германия бўйлаб электр тизимларини камида икки ҳафтага ишдан чиқариш, кейин эса Германия соғлиқни сақлаш вазири Карл Лаутербахни қурол билан ўғирлаб кетиш режалаштирилган эди, дейди прокурорлар.

Хабар қилинишича, гумонланувчилар «фуқаролар урушига ўхшаш шарт-шароитлар» яратмоқчи бўлган ва ҳукуматни ағдариш, янги «раҳбарлар»ни тайинлаш учун Берлинда йиғилиш ўтказишни режалаштирган. Бу режалардан ҳеч нарса чиқмади - қурол сотиб олаётганда гумондорлар яширин хавфсизлик ходимига дуч келган.