Фарғона давлат университети дунёнинг нуфузли рейтингидан жой олди

Жаҳоннинг энг нуфузли халқаро университетлар рейтинг ташкилоти “Round University Ranking” – “RUR” томонидан бугун эълон қилинган натижаларга кўра, Фарғона давлат университети ўқитиш индикатори бўйича ТОП - 883-ўринни эгаллади.

Ўзбекистон олийгоҳлари ичида эса 7-ўринга муносиб деб баҳоланди ва Олий таълим, фан ва инновациялар вазирлиги томонидан эътироф этилган ушбу рейтинг ташкилоти рўйхатида етакчи олий таълим муассасалари сафидан ўрин эгаллади.

Маълумот учун, мазкур рейтинг тизими – 2010 йилда ишга туширилган ва дунёнинг 82 та давлатида жойлашган 1 215 та олий таълим муассасаларининг 4 та йўналишда (таълим, илмий тадқиқот, халқаро ҳамкорлик, молиявий барқарорлик) 20 та индикатор асосида рейтинг баҳолаш тизимидир.

“Round University Ranking” – “RUR” учун барча маълумотлар Томсон Рейтерс халқаро компанияси томонидан тақдим этилган. Рейтинг ташкилоти рейтинглари 2010 йилдан ҳозирги кунгача бўлган даврни ўз ичига олади. Шунингдек, у манфаатдор томонлар фаолияти тўғрисида етарли маълумотни тақдим этишга қаратилган баҳолаш тизими сифатида ишлаб чиқилган.

Барча дастлабки маълумотлар (талабалар сони, академик ходимлар ва бошқалар) Thomson Reuters томонидан Global Institutional Profiles Project (GIPP) деб номланган махсус маълумотлар сўрови орқали тақдим этилади. Ушбу сўров ҳар йили баҳорда ўтказилади ва бутун дунё бўйлаб 700-800 та олий таълим муассасаларини қамраб олади.

Юқоридаги кўрсаткичлар асосида хулоса қилиш мумкинки, бугун Фарғона давлат университети халқаро эътироф этилган ташкилотлар рейтинги рўйхатига кириш учун жиддий рақобатга киришган ва дунёнинг кучли университетлари қаторидан жой олиш учун ўз стратегиясига эга.