БМТ судида Украинанинг Россияга қарши даъвосига 32 давлат қўшилди

БМТ Халқаро суди аъзоларининг кўпчилиги 32 давлатни Украинанинг Россияга қарши Геноцид жиноятининг олдини олиш ва унинг учун жазолаш тўғрисидаги конвенцияни бузганликда айблаган даъвосига қўшишга рози бўлди.

Фото: Reuters

Дастлабки эшитувлар босқичида Европа Иттифоқининг 26 давлати (Венгриядан ташқари), Австралия, Канада, Янги Зеландия, Норвегия, Лихтенштейн ва Буюк Британия даъвога қўшилди.

Қарор 14 нафар судянинг битта қарши овози билан қабул қилинди, дейилади Ҳаага судининг матбуот баёнотида.

Шу билан бирга, БМТ суди томонларнинг дастлабки эътирозлари босқичида Қўшма Штатларнинг даъвога розилигини бир овоздан рад этди.