Туркия Ўзбекистоннинг бир қатор маҳсулотларига импорт божини бекор қилди

Божхона тўловларини бекор қилиш тўғрисидаги қарор, жумладан, шолғомсимон ва узунчоқ пиёз, нўхат, олхўри каби маҳсулотларга нисбатан қўлланади.

Фото: Anadolu Agency

Туркия президенти қарори асосида Савдо вазирлиги томонидан тайёрланган Ўзбекистонда етиштириладиган айрим турдаги товарларни импорт қилиш бўйича тариф квоталари қўллаш тўғрисидаги фармойиш ҳукуматнинг расмий нашрида эълон қилинди. Бу ҳақда Anadolu хабар берди.

Унга кўра, Туркия ва Ўзбекистон ўртасида имзоланган Имтиёзли савдо битими доирасида Ўзбекистонда етиштириладиган бир қатор товарлар импортига қўлланадиган тариф квоталари ўзгартирилди.

Хусусан, ҳужжатда шолғомсимон ва узунчоқ пиёз, нўхат, олхўри каби маҳсулотларга нисбатан божлар бекор қилиниши кўзда тутилган. Кўриб чиқилаётган тариф квоталари доирасида ушбу товарлар учун божхона тўлови нолга тенглаштирилади.

Қарор ва фармойиш 2023 йил 1 июлдан кучга киради.