Берлин: Литвадаги Бундесвер кучлари Россия-НАТО актини бузмайди

Германия Литвада доимий равишда Бундесвер бригадасини жойлаштиришга тайёр. Россия-НАТО акти альянснинг «шарқий қанотини мустаҳкамлашда чекловчи омил бўла олмайди», дея тушунтирди Германия ТИВ.

Фото: Michael Kappeler/dpa/picture alliance

Германиянинг Литвада Германия Қуролли кучларининг (Бундесвер) 4000 га яқин аскарини доимий равишда жойлаштиришга тайёрлиги Россия-НАТО актини бузмайди, дея маълум қилди расмий Берлин 28 июнь, чоршанба куни. 1997 йил май ойида имзоланган ҳужжат Шимолий Атлантика альянсининг «шарқий қанотини мустаҳкамлашда чекловчи омил бўла олмайди», деди Германия Ташқи ишлар вазирлиги расмий вакили.

Шартномада тахмин қилинадиган хавфсизлик шартлари кўрсатилган, дейди Берлин. Сўнгги йилларда Россия уларни бир неча бор бузди, дея қўшимча қилди Германия ТИВ.

Германия ҳукумати матбуот котиби Штеффен Хебештрайтнинг айтишича, Украинага ҳарбий аралашув актга «очиқ-ойдин қарама-қаршидир». Шунинг учун Берлин «ҳозирча ўзини ушбу ҳужжат билан боғланган деб ҳисоблай олмайди», дея қўшимча қилди у. Айни пайтда Германия канцлери Олаф Шолц НАТО шартномани бекор қилмаслиги кераклигига ишончи комил. Москва билан янги келишув бўйича музокаралар «ҳозирда ҳеч қандай истиқболга эга эмас», деди Хебештрайт.

Бундесвер аскарлари ва зобитларининг Литвада кутилаётган жойлаштирилиши «ўзини хавф остида ҳис қилаётган НАТО ҳамкорларига сигнал беради: улар ёлғиз қолмайди», деди Германия ҳукумати вакили. «Агар НАТО ҳудудига ҳужум бўлса, биз ҳужумни қайтаришда ҳар қандай йўл билан ёрдам беришга мажбур бўламиз», — дея қўшимча қилди у.