Тошкент шаҳар Маданият бошқармасига янги раҳбар тайинлангани маълум бўлди

Май ойи охирида Тошкент шаҳар Маданият ва туризм бош бошқармасига янги раҳбар тайинлангани маълум бўлди. Маданият ва туризм вазирлигининг хабарига кўра, ушбу лавозимга Санжар Тожиев тайинланган. У тайинловга қадар шу бошқарма бошлиғининг 1-ўринбосари лавозимида ишлаган.

Бунгача мазкур лавозимни Абдуваҳоб Сахиев эгаллаб келаётганди. У суд ҳукми билан жазога тортилиб, мансабдор бўлиш ҳуқуқидан маҳрум қилинса-да, маълум муддат лавозимида қолди. 

Жиноят ишлари бўйича Миробод туман судининг 2022 йил ноябрь ойидаги ҳукмига кўра, Абдуваҳоб Сахиев ҳамда бошқарма бош ҳисобчиси Феруза Умаровага нисбатан Жиноят кодексининг 184-1-моддаси 2-қисми (жуда кўп миқдорда бюджет ва смета-штат интизомини бузиш)да назарда тутилган жиноятни содир этганликда айбдор деб топилган.

Абдуваҳоб Сахиевга базавий ҳисоблаш миқдорининг 60 баравари миқдорида жарима ҳамда Жиноят кодексининг 45-моддасига асосан 1 йил муддатга давлат органларида раҳбарлик лавозимларида ишлаш ҳуқуқидан маҳрум қилиш жазоси тайинланган. Жорий йил 14 март куни ишни қайта кўриб чиққан Тошкент шаҳар судининг жиноят ишлари бўйича судлов ҳайъати апелляция шикоятини қаноатлантирмаган, биринчи инстанция суди ҳукмини ўзгаришсиз қолдирган. Мазкур иш кассация тартибида қайта кўрилаётганди, аммо натижаси ҳақида жамоатчиликка маълум қилинмади.

Тошкент шаҳар маданият бош бошқармаси 2022 йилнинг иккинчи ярмида, Абдуваҳоб Сахиевнинг раҳбарлиги даврида танловсиз шартномалар ва пост-фактум тендерлар билан “тилга тушганди”. Ушбу масалада суриштирув олиб борган Kun.uz журналисти пойтахт ҳокимлиги 6 та фестивал учун 18,2 млрд сўм сарфлагани, қатор шартномалар тендерсиз тузилгани, қўшимча равишда ўтказилган тендерлар фестиваллар ўтиб бўлганидан бир неча ой кейин ташкил этилгани ва уларда ҳам тўғридан тўғри шартномани олган фирмалар ғолиб деб топилгани ҳақида ёзганди. 

Кўп ўтмай Бош прокуратура ушбу ҳолатда амалда бажарилмаган ишлар ва кўрсатилмаган хизматлар учун 8 млрд сўмлик бюджет маблағлари талон-торож қилингани ҳақида хабар берганди.