Ўзбекистон ва Франция парламенти вакиллари учрашди

Сенат раиси Франция Сенати раиси Жерар Ларше билан учрашди.

Учрашув чоғида икки давлат ўртасидаги муносабатларни янада ривожлантириш, шу жумладан парламентлараро ҳамкорликни мустаҳкамлаш масалалари муҳокама этилди.

Франция Сенати раиси Жерар Ларше мамлакатимизда кечаётган туб янгиланишлар жараёнини мамнуният билан тилга олиб, сўнгги йилларда Ўзбекистоннинг чинакам бозор иқтисодиётига ўтиши ва жаҳонга очилиш йўлида амалга оширган ишлари мустақилликнинг барча йиллари давомида қилинган жами ишлардан ҳам салмоқли эканлигини эътироф этди.

Франциянинг Ўзбекистонга бўлган қизиқиши ниҳоятда катта эканига урғу бериб, Ларше «Ўзбекистон минтақада энг аҳолиси кўп бўлган кучли давлат – Марказий Осиёнинг уриб турган юрагидир. Айниқса, жаҳонда бугунги кунда кузатилаётган мавҳумлик ва нотинчлик шароитида давлатингизни минтақадаги хавфсизлик ва тинчлик маркази деб биламиз» деб таъкидлади.

Бугунги кунда Ўзбекистон Республикаси Олий Мажлисининг палаталарида Франция парламенти билан ҳамкорлик гуруҳлари ташкил этилган бўлиб, Франция Сенатида ҳам «Франция – Марказий Осиё» парламентлараро гуруҳи, қуйи палата – Миллий ассамблеяда «Франция – Ўзбекистон» дўстлик гуруҳи фаолият юритмоқда.

Танзила Норбоева ҳамкорлик гуруҳлари салоҳиятидан янада самарали фойдаланиш муҳимлигини, жумладан, мамлакатлар ўртасидаги парламентлараро ҳамкорликнинг таянч нуқталари қонун ижодкорлиги, кучли парламент назорати ва ҳудудий вакиллик тамойилларига қурилиши зарурлигини алоҳида таъкидлади. Шу ўринда иккала парламентнинг турдош масалаларга масъул қўмиталари ўртасида ҳам мустаҳкам алоқалар ўрнатилиши мазкур мулоқот механизмининг амалий самарасини таъминлашига урғу берди.

Томонлар икки палатали парламент демократик ривожланишнинг муҳим таркибий шарти эканини бирдек эътироф этиб, давлатлар ўртасидаги парламентлараро алоқаларни ривожлантиришда юқори палаталарнинг вакиллик демократияси механизмларидан самарали фойдаланиш зарурлиги таъкидланди.

Суҳбат якунида Франция ва Ўзбекистон маҳаллий ҳокимият органлари ўртасидаги алоқаларни йўлга қўйиш, қонун ижодкорлиги соҳасида тажриба алмашиш, шунингдек, яшил иқтисодиёт, коррупцияга қарши курашиш, гендер тенгликни таъминлаш соҳаларида ҳам конструктив хамкорлик қилишга келишиб олинди.