Fitch рейтинг агентлиги АҚШ рейтингини пасайтирди

Fitch рейтинг агентлиги АҚШнинг узоқ муддатли рейтингини ААА дан АА+ га туширди, дейилади 1 август, сешанба куни эълон қилинган расмий хабарда. Рейтингнинг пасайиши «келгуси уч йил ичида фискал ҳолатнинг кутилаётган ёмонлашувини, ҳукуматнинг юқори ва ўсиб бораётган қарз юкини ва бошқарувнинг ёмонлашувини акс эттиради», дея таъкидлайди Fitch. 

Тўлов қобилиятининг энг юқори даражаси, яъни дефолтнинг минимал хавфини билдирувчи ААА камида 1994 йилдан бери Fitch рейтингида АҚШ томонидан ушлаб турилган. Moody's АҚШга энг юқори ААА рейтингини беришда давом этмоқда, S&P эса 2011 йилда рейтингни АА+ (юқори тўлов қобилияти, дефолтнинг паст эҳтимоли)га туширган. 

«Биз бу қарорга қатъиян рози эмасмиз. Президент Жо Байден дунёдаги энг кучли иқтисодлардан бирида энг катта тикланишга эришганида, рейтингни пасайтириш ҳақиқатга зиддир», деди Оқ уй матбуот котиби Карин Жан-Пьер сешанба куни берган баёнотида.