Трамп Эроннинг бойитилган урани йўқ қилинишини айтди

Қўшма Штатлар Теҳрон ва ХАЭА билан ҳамкорликда Эроннинг бойитилган уранини олади ва йўқ қилади. Бу ҳақда АҚШ президенти Доналд Трамп Truth Social ижтимоий тармоғида маълум қилди.

Фото: Getty Images

«11 ой олдин B-2 бомбардимончиларимиз ҳужуми оқибатида амалда вайрон бўлган тоғлар остига чуқур кўмилган, баъзан «ядро чанги» деб аталадиган бойитилган материал Қўшма Штатлар томонидан Эрон ва ХАЭА билан яқин алоқада ва ҳамкорликда олиб чиқилади ва йўқ қилинади», деди Трамп Теҳрон ва Вашингтон томонидан ишлаб чиқилган келишувга изоҳ берар экан.

25 май куни Tasnim агентлиги Эрон юқори даражада бойитилган уранни хорижга экспорт қилишга рози бўлгани ҳақидаги хабарлар ҳақиқатга тўғри келмаслигини ёзган эди. Бунгача Саудия Арабистонининг Al-Hadath канали манбаларга таяниб, Теҳрон Хитойга уран захираларини олиб чиқишга тайёрлигини маълум қилган эди.

Бойитилган урандан воз кечиш Вашингтоннинг Теҳронга қўяётган асосий талабларидан биридир. Мавжуд захираларни Россияга олиб чиқишни президент Владимир Путин ҳам таклиф қилган эди. 18 май куни Al-Hadath Эрон маълум шартлар асосида бойитилган уранни АҚШ ўрнига Россияга беришга рози эканини даъво қилди.