Жиноят кодексига сейсмик хавфсизлик бўйича ўзгартиришлар киритилади

Жиноят кодексининг 229-3-моддасига шаҳарсозлик тўғрисидаги қонунчиликка мувофиқ биноларни, иншоотларни ёки бошқа объектларни қуришга, реконструкция қилишга ва капитал таъмирлашга тақиқлар (чекловлар) белгиланган зоналарда шундай ишларни амалга оширганлик учун жиноий жавобгарликни кескин равишда оширишга қаратилган ўзгартиришлар киритилмоқда.

Маъмурий жавобгарлик кодекси 99-моддасига (Шаҳарсозлик тўғрисидаги қонунчиликни бузиш) Шаҳарсозлик ҳужжатларини ишлаб чиқувчиларнинг буюртмачига қурилиш-монтаж ишларини шаҳарсозлик ҳужжатларига мувофиқ амалга ошириш бўйича бериладиган ёзма кўрсатмаларини буюртмачи томонидан бажаришдан бўйин товлаш ёки ўз вақтида бажармаганлик учун жавобгарликни жорий этиш таклиф этилмоқда.

Унга кўра, бундай ёзма кўрсатмаларни бажармаслик учун фуқароларга базавий ҳисоблаш миқдорининг беш бараваридан ўн бараваригача, мансабдор шахсларга эса — ўн бараваридан йигирма бараваригача миқдорда жарима жазоси назарда тутилмоқда.

Маъмурий жавобгарлик кодексининг 99-моддасининг ўнинчи қисми санкцияси кучайтирилиб, шаҳарсозлик тўғрисидаги қонунчиликка мувофиқ биноларни, иншоотларни ёки бошқа объектларни қуришга, реконструкция қилишга ва капитал таъмирлашга тақиқлар (чекловлар) белгиланган зоналарда шундай ишларни амалга оширганлик учун фуқароларга базавий ҳисоблаш миқдорининг етмиш бараваридан юз бараваригача, мансабдор шахсларга эса — юз бараваридан бир юз эллик бараваригача миқдорда жарима жазоси белгилаш таклиф этилмоқда.