Дам олиш кунлари Ҳаагада 3 мингга яқин экофаол қўлга олинди

Ҳаагада дам олиш кунлари Нидерландиянинг иқлим сиёсати кескинлашгани масаласига бағишланган икки норозилик намойиши чоғида қарийб 3000 киши қўлга олинди. Бу ҳақда 10 сентябр, якшанба куни dpa хабар берди.

Шанба ва якшанба кунлари Extinction Rebellion (XR) фаоллари Нидерландия парламенти ва ҳукумат кварталлари яқинидаги йирик А12 автомагистралини тўсиб қўйди. Икки кун давомида полиция фаолларга қарши сув пуркагичлардан фойдаланган. Якшанба куни 500 дан ортиқ иштирокчи, бир кун олдин эса 2400 га яқин киши қўлга олинган. 

Шаҳар маъмуриятига кўра, якшанба куни блокадада 1000 га яқин одам, шанба куни эса 9000 га яқин фаол иштирок этган. XR ва бошқа ташкилотлар маълумотларига кўра, акциялар асосан мувофиқлаштирилган ҳолда ўтган автомагистралдан ташқарида яна бир неча минг киши намойишда қатнашган. 

Қўлга олинганлар тезда қўйиб юборилди 

Ҳаага мэри Ян ван Занен йўлни тўсиб қўйган фаолларнинг қўлга олинишини маъқуллади. Dpa маълумотларига кўра, уларга Ҳаага марказий вокзали яқинида ҳам намойиш ўтказиш таклиф қилинган, бироқ XR рад жавобини берган. Қўлга олинганлар автобусда маҳаллий футбол клуби стадионига олиб кетилган ва қўйиб юборилган. Полиция маълумотларига кўра, фақат бир неча фаолга нисбатан жиноий иш қўзғатилган. 

XR Нидерландияда кўмир, нефт ва газ каби қазиб олинадиган ёнилғи учун барча давлат субсидиялари бекор қилинмагунча ҳар куни А12 автомагистралини тўсиб қўйишни режалаштираётганини билдирди, деб ёзади dpa. Гуруҳ ҳукуматни солиқ имтиёзлари ва авиация, денгиз транспорти, қазиб олинадиган ёнилғи ҳамда нефт учун субсидияларнинг бошқа шаклларини қисқартириш ваъдасидан воз кечишда айблади.