«Охирги авлод» фаоллари очиқ эълон қилинган норозилик акцияси доирасида дарвозага тўқ сариқ рангли бўёқ сепган.
«Охирги авлод» ҳаракатининг иқлим ҳимояси фаоллари Берлин марказидаги Бранденбург дарвозасига тўқ сариқ рангли бўёқ сепиб кетди. Бу ҳақда 17 сентябр, якшанба куни dpa хабар берди.
Фаоллар бўёқни ўт ўчиргичлар ёрдамида пуркаган. Натижада дарвозанинг барча олтита устунига зарар етган. 13 нафар фаол қўлга олинди ва фавқулодда хизматлар воқеа жойида ишламоқда, деди полиция вакили. Дарвоза атрофи ўраб олинган. «Норозилик шуни аниқ кўрсатмоқдаки, сиёсий ўзгаришлар вақти келди, қазиб олинадиган ёқилғидан адолатга сари», - дея фаолларнинг сўзларидан иқтибос келтирган dpa.
Берлин бургомистри фаолларни кескин танқид қилди
Берлинга раҳбарлик қилувчи бургомистр Кай Вегнер вандализм ҳаракатини кескин танқид қилиб, дарвоза эркинлик шаҳри сифатида Берлиннинг рамзи эканлигини эслатди. «Шаҳар - сўз эркинлиги ва келажагимиз ҳақида адолатли баҳс-мунозаралар тарафдори. Бу гуруҳ ўз ҳаракатлари билан нафақат тарихий Бранденбург дарвозасига, балки бизнинг замон ва келажагимизнинг муҳим масалалари ҳақидаги эркин суҳбатимизга ҳам зарар етказяпти», - деди Вегнер.
У фаолларнинг ҳаракатларини «норозилик» эмас, балки «мулкка зарар етказиш ва жиноий ҳуқуқбузарлик» деб атади. «Бу билан улар иқлимни муҳофаза қилишнинг муҳим масаласига ёмон хизмат қилмоқда. Иқлимни муҳофаза қилишга жиддий ёндашганлар бу ҳаракатлардан ва бу гуруҳдан узоқлашиши керак», деди бургомистр.
Германия бўйлаб «Келажак учун жума» намойишлари бўлиб ўтди
«Охирги авлод» фаоллари 13 сентябрдан Берлинда муддатсиз норозилик намойиши ўтказишини эълон қилди. Ташкилотчилар айтишича, «бутун Германиядан юзлаб одамлар» федерал ҳукуматдан 2030 йилгача қазиб олинадиган ёқилғидан воз кечишни талаб қилиш учун пойтахтга боради. «Охирги авлод» фаолларининг энг кенг тарқалган кураш усули - бу Берлин полиция хизматлари огоҳлантирган йўлларни тўсиб қўйишдир.
Ўтган ҳафта Германиянинг 250 шаҳрида «Келажак учун жума» иқлим бўйича тадбирлари бўлиб ўтди. 15 сентябр, жума куни бутун мамлакат бўйлаб уларда 250 мингга яқин киши иштирок этди. Аксарият одамлар Берлин кўчаларига чиқди, у ерда ташкилотчиларга кўра – 25 минг, полиция маълумотларига кўра – 12,5 минг киши тўпланган.
Ҳамбургда, полицияга кўра, 10 мингга яқин иштирокчи, Мюнхенда - 7000 га яқин, Кёлнда камида 5000 киши кўчаларга чиқди. Акция немис касаба уюшмалари, атроф-муҳитни муҳофаза қилиш ташаббуслари томонидан қўллаб-қувватланди, деб таъкидлайди epd агентлиги.
