Исроил армияси Ғазо секторидаги қуруқлик операцияси қачон бошланишини маълум қилди

Ҳарбий операция «ҳудудда тинч аҳоли билан боғлиқ вазиятга баҳо берилганидан сўнг» бошланади.

Фото: CNN

Исроил мудофаа кучлари (ЦАХАЛ) матбуот котиби Жонатан Конрикус Ғазо секторидаги қуруқлик операцияси қачон бошланишини маълум қилди. Унинг сўзларига кўра, ҲАМАС аъзоларига қарши ҳарбий операция «ҳудудда тинч аҳоли билан боғлиқ вазиятга баҳо берилганидан сўнг» бошланади.

Конрикуснинг таъкидлашича, ҲАМАС Ғазо сектори аҳолисини жанубга кўчиб ўтишига тўсқинлик қилиб, уларни «тирик қалқон»га айлантирмоқда. Бу тегишли хабарларни юбориш, блокпостларни қўйиш ва уларнинг йўналиши бўйлаб тўсиқларни яратиш орқали амалга оширилмоқда.

Қайд этилишича, ЦАХАЛ ҳудудда қанча тинч аҳоли қолаётгани ва уларнинг қанчасига ҲАМАС тўсқинлик қилаётганини тушуниб олиши керак. Жанубга кўчган Ғазо аҳолиси ЦАХАЛ ҳудудни «хавфсиз деб эълон қилган» тақдирда орқага қайтиши мумкин. Конрикус уларни «ақл билан иш тутиб, хавфли ҳудуддан чиқишга» чақирди.

Аввалроқ, Исроил мудофаа кучлари Ғазо сектори аҳолисини 14 октябр куни кечқурунгача тасдиқланган иккита йўналиш бўйлаб жанубга кўчиб ўтишга чақирган эди. Бир кун аввал ЦАХАЛ Ғазо секторининг шимолий қисми аҳолисини эрталаб жанубга кўчиб ўтишга чақирган ва бунинг учун 24 соат муҳлат берди. Инсон ҳуқуқлари ва инсонпарварлик ташкилотлари буни қисқа вақт ичида амалга ошириш мумкин эмаслигини айтишди. Ғазо секторида тахминан 1,5 млн киши истиқомат қилади.

#Исроил #Фаластин #Ғазо

2023 йил 7 октябр куни Ғазо бўлгасидаги Ҳамас кучлари Исроилга ёппасига ракета зарбалари бериб, чегарадаги аҳоли пунктларини эгаллай бошлади. Бунга жавобан Исроил қўшинлари Ғазо бўлгасига бостириб кирди. Бу сафарги эскалация аввал кузатилмаган даражада кўп қурбонларга олиб келди.