Тай-чи жанг санъати Паркинсон касаллиги аломатларини бир неча йилга секинлаштиради — тадқиқот

Тай-чи билан ҳафтада 2 марта шуғулланганлар, бу машқларни бажармайдиганлардан кўра соғлик билан боғлиқ муаммолардан камроқ шикоят қилиши ва соғломроқ ҳаёт кечириши айтиляпти.

Фото: Reuters

Паркинсон касаллиги қалтираш ва секин ҳаракатланишни бошлаш касаллиги бўлиб, уни даволаш имконсиз. Хитойлик тадқиқотчилар жисмоний машқлар бу касалликни секинлаштириш ҳақидаги тадқиқотларни тасдиқлаб, тай-чи жанг санъати касаллик аломатлари бошланишини секинлаштиришини аниқлади.

Тадқиқот Шанхай Jiao Tong университети тиббиёт факултети томонидан олиб борилган. Унда 5 йил давомида Паркинсон билан касалланган юзлаб беморларнинг саломатлиги кузатилган.

Тай-чи билан шуғулланадиган 147 кишидан иборат бир гуруҳ ва бу машқларни бажармайдиган 187 кишидан иборат гуруҳлар ўрганилган. Секин ҳаракатларга асосланган хитойча машқлар чуқур нафас олиш, ўзни эркин қўйиш билан уйғунликда бажарилади.

Натижаларга кўра, тай-чи билан шуғулланганларда Паркинсон секин ривожланган. Шунингдек, уларда бел оғриғи, мувозанатни сақлай олмаслик, бош айланиши, хотира ва концентрация муаммолари ҳам бошқа гуруҳга қараганда камроқ бўлган. Уйқу ва яшаш сифати яхшиланган.

Буюк Британия Паркинсон хайрия ташкилоти тай-чини кайфиятни кўтаради ва яхши яшашга ёрдам берадиган паст интенсивликдаги жисмоний фаолият деб атайди.

Тадқиқот давомида яхши ўзгаришлар кузатилганига қарамай, Journal of Neurology Neurosurgery & Psychiatry журналида бу тадқиқот нисбатан кичик гуруҳда олиб борилгани сабаб тай-чи Паркинсондан яхши ҳимоя қилади деб узил-кесил айтиб бўлмайди. Умуман ўзи қайси машқлар Паркинсонни секинлаштириши ёки ижобий таъсир қилишини аниқ айтиш учун кўпроқ тадқиқотларга эҳтиёж бор.

Тай-чи мустақил қандай бажарилади?

Ойни ушлаб туриш усули

Бунда қўлингизни худди ойни кўтариб тургандек тутинг. Нафас олиб танангизнинг белдан тепа қисмини чапга буринг. Елкалар бўшаштирилган ва тирсаклар бироз эгилган ҳолатга киринг. Нафас олинг, қўлларингизни пастга туширинг. Ва худди шу ҳаракатни ўнг томонга қараб такрорланг.

Белни буриш ва кафтларни суриш усули

Нафас олинг, кафтларингизни белдан юқорига қаратиб тортинг. Нафас чиқаринг, тананинг белдан тепа қисмини чапга буринг. Чап тирсак ва билакни бир оз эгиб туринг ва тирсакни орқага тортинг. Ва худди шу пайтда ўнг қўлни олдинга чўзинг ва ўнг кафтингизни очиб олдинга қаратинг (худди кимнидир сизга яқинлашишдан тўхтатиб қоладигандек ҳолатда).

Кейин яна нафас олинг, ўртага қайтинг ва шу машқларни тескари, яъни ўнг томонга қараб яна такрорланг.