UNFF Ўзбекистонда «Яшил макон» лойиҳасини амалга оширишга кўмаклашади

Экология, атроф-муҳитни муҳофаза қилиш ва иқлим ўзгариши вазирлиги маълумотига кўра, учрашувда UNFF билан ҳамкорликни янада ривожлантириш ва кенгайтириш истиқболлари кўриб чиқилди. 

Ўзбекистонда ўрмонзорлаштириш ишларига илмий ёндашувни ривожлантириш, "ақлли" қишлоқ хўжалигини татбиқ этиш ҳамда ўрмонларни барқарор бошқаришда БМТнинг ўрмонлар ва кўкаламзорлаштириш бўйича форуми кўмагини жалб қилишга келишилди. "Яшил макон" лойиҳасини амалга оширишда ҳамкорлик қилиш, Марказий Осиё атроф-муҳит ва иқлим ўзгаришини ўрганиш университетида юқори малакали экспертлар маърузаларини ташкил этиш, ўрмон хўжалиги соҳасидаги мутахассисларнинг салоҳиятини ошириш мақсадида тренинг ва семинарлар ўтказиш борасида келишувларга эришилди.

Жулиетто Биао БМТнинг ўрмонлар ва кўкаламзорлаштириш бўйича форуми котибияти директори ташкилот ўрмон хўжалиги ва боғдорчилик соҳасини ривожлантиришга ёрдам беришга тайёр эканини таъкидлади.

UNFF БМТнинг ўрмонлар ва кўкаламзорлаштириш бўйича форуми 2000 йилда ташкилотнинг Иқтисодий ва ижтимоий кенгаши томонидан барча турдаги ўрмонларни бошқариш, сақлаш ва барқарор ривожлантиришга кўмаклашиш ҳамда узоқ муддатли сиёсий мажбуриятларни мустаҳкамлаш мақсадида ташкил этилган.