Маҳачқалъадаги тартибсизликлар бўйича 27 киши ҳибсга олинган

Маҳачқалъа аэропортидаги тартибсизликлар бўйича ҳибсга олинганлар сони 27 кишига етди. «Медиазона» интернет-нашри Доғистон Олий суди маълумотлар базасига таяниб, 17 ноябр, жума куни шундай хабарни эълон қилди.

Суд ҳужжатларида оммавий тартибсизликларда иштирок этганлик учун ҳибсга олинганлар бўйича 27 та шикоят берилган. Аввалроқ Доғистон Олий суди 17 кишига нисбатан қарорларни маъқуллаган эди. Суд вакиллари «Медиазона»га ҳибсга олишлар ҳаво бандаргоҳидаги тартибсизликлар билан боғлиқлигини тасдиқлади. Нашр маълумотларига кўра, 14 ноябрга қадар республика судларига камида 302 кишига қарши ноқонуний митинг ўтказилгани бўйича баённомалар келиб тушган.

Маҳачқалъа аэропортидаги тартибсизликлар

29 октябр куни кечқурун Тел-Авивдан Red Wings авиакомпаниясининг навбатдаги рейси етиб келгунига қадар бир неча юз киши Маҳачқалъа халқаро аэропортига бостириб кирди. Улар бир неча соат давомида аэропортни эгаллаб олди ва яҳудийларга қарши шиорлар билан ҳар бир хонага кириб, яҳудийларни қидирди. Тартибсизликлар қатнашчилари эшикларни бузиб, аэропорт ҳудудидан чиқиб кетаётган машиналарни тўсиб қўйган, ўзбошимчалик билан у ердаги одамларнинг паспортларини текширган ва етиб келган самолётга киришга ҳаракат қилган.

30 октябрга ўтар кечаси шаҳарга Россия гвардиясининг махсус кучлари етиб келди. Тартибсизликлардан кейин 60 киши қўлга олинган. Воқеа натижасида, Доғистон Соғлиқни сақлаш вазирлиги маълумотларига кўра, 20 киши, жумладан, тўққиз нафар полициячи жароҳатланган. 

Доғистон ҳукумати, Россиядаги мусулмонлар ва яҳудийлар конфессиялари вакиллари, шунингдек, қатор давлатлар Маҳачқалъа аэропортидаги тартибсизликларни қоралади. Россия президенти Владимир Путин воқеада ғарб махсус идораларини айблади. Россия Тергов қўмитасининг Доғистон бўйича бошқармаси оммавий тартибсизликлар моддаси бўйича жиноий иш қўзғатди.