Ўзбекистон фаровонлик рейтингида 100-ўринни эгаллади 

Англиянинг Legatum Institute халқаро таҳлилий маркази мамлакатларнинг фаровонлик даражаси бўйича навбатдаги рейтингини эълон қилди (Legatum Prosperity Index 2023). 

Ўзбекистон ушбу рейтингда дунёнинг 167 давлати орасида 100-ўринни эгаллади. 

Бу Марказий Осиё давлатлари орасида учинчи кўрсаткич: Қозоғистон 69-ўринда, Қирғизистон 94-ўринда, Туркманистон 107-ўринда ва Тожикистон 113-ўринда қайд этилган. 

Тадқиқот муаллифлари фикрига кўра, Скандинавия мамлакатлари - Дания, Швеция ва Норвегия дунёдаги энг гуллаб-яшнаган давлатлар ҳисобланади. Энг фаровон мамлакатлар бешлигига Финляндия ва Швейцария ҳам кирди. 

Рейтингда сўнгги ўринларни Сомали, Афғонистон, Марказий Африка Республикаси, Яман ва Жанубий Судан эгаллаган. 

Фаровонлик индекси 2006 йилдан бери дунё мамлакатлари эришган ютуқларни уларнинг гуллаб-яшнаши нуқтаи назаридан ўлчайдиган композит кўрсаткичдир. Индекс жамиятнинг турли жиҳатлари ва ижтимоий фаровонлик параметрларини акс эттирувчи 12 тоифага бирлаштирилган кўплаб турли кўрсаткичлар асосида тузилган. 

Ўзбекистоннинг ушбу параметрлар бўйича эгаллаган ўринлари: 

- ижтимоий капитал (46-ўрин);

- соғлиқни сақлаш (49-ўрин);

- хавфсизлик (53-ўрин);

- таълим (73-ўрин);

- иқтисодиёт сифати (79-ўрин).

- яшаш шароитлари (103-ўрин);

- инфратузилма ва бозорга кириш имконияти (104-ўрин);

- инвестиция муҳити (107-ўрин);

- ишбилармонлик муҳити (121-ўрин);

- давлат бошқаруви (123-ўрин);

- шахсий эркинликлар (147-ўрин);

- атроф-муҳит (162-ўрин). 

Legatum Institute 2007 йилда Дубайда жойлашган Legatum Group инвестиция фирмасининг хайрия бўлими ҳисобланмиш Legatum фонди томонидан ташкил этилган.