Ўзбекистонда дам олиш кунлари кутилаётган об-ҳаво маълум қилинди

Бугун кундузи Ўзбекистон ҳудуди бўйича об-ҳаво булутли бўлади, ёғингарчилик бўлмайди. Ҳарорат +8...+13 даража, шимолда +0...+5 даража бўлади.

“Ўзгидромет” хабарига кўра, эртага, 8 декабр куни республиканинг аксарият ҳудудларида баъзи жойларда ёмғир ёғади, фақат Қорақалпоғистон Республикаси, Хоразм, Сурхондарё вилоятлари ва Фарғона водийси вилоятларида ёғингарчилик кутилмайди. Ҳаво ҳарорати кечаси +0...+5 даражагача, кундузи +5...+10 даражагача, шимолда кечаси -2...-7 даражагача, кундузи -0...-2 даражагача пасаяди.

9 декабр, шанба куни ёмғир ва қор кўринишидаги ёғингарчилик фақат Ўзбекистоннинг марказий ва шарқий ҳудудларида сақланиб туради.

8-9 декабр кунлари тоғли ҳудудларда ёғингарчилик - асосан қор шаклида бўлади, баъзи жойларда ёғингарчилик кучли бўлади.

8-9 декабрь кунлари республика бўйича баъзи жойларда шамол 15-20 м/с гача кучайиши кутилмоқда

10 декабр - якшанба куни республиканинг аксарият ҳудудларида ёғингарчилик кутилмайди, Қорақалпоғистон Республикаси ва Хоразм вилоятида баъзи жойларда бироз қор ёғади. Ҳаво ҳарорати шанба куни кечаси +0...+5 даража, кундузи +3...+8 даража, якшанба куни кечаси -2...+3 даража, кундузи +5...+10 даража атрофида бўлади.

Республика шимолида дам олиш кунлари кечаси -5...-10 даражагача, кундузи -0...-5 даражагача бўлади

Кейинги ҳафтанинг биринчи ярмида совуқ республиканинг барча ҳудудларини қамраб олади. Ҳаво ҳарорати кечалари -8...-13 даражагача, кундуз кунлари -3...-8 даражагача пасаяди. Республика шимолида ҳарорат кечалари -15...-20 даражагача, кундуз кунлари -7...-12 даражагача пасаяди.

Пойтахтда 7 ва 10 декабр кунлари ёғингарчилик кутилмайди, 8 декабрда куннинг иккинчи ярмида ёмғир ёғади, 9 декабрда вақти-вақти билан ёғингарчилик бўлади (ёмғир, қорга айланиши мумкин). Ҳарорат 7 декабрда +9...+11 даража, 8-10 декабрда кечаси +0...+5 даража, кундузи +4...+9 даража бўлади.