Вучич Сербиядаги сайловларда ўз блоки ғалаба қозонганини эълон қилди

Сайлов бюллетенларининг 80 фоизи санаб бўлингач, «Александар Вучич Сербия тўхтатмаслиги керак» коалицияси Миллий ассамблеядаги 250 ўриндан 129 тасини қўлга киритгани ойдинлашди, дея маълум қилди президент.

Фото: Predrag Milosavljevic / XinHua / Global Look Press

18 декабр, душанбага ўтар кечаси Сербия президенти Александар Вучич мамлакатда бўлиб ўтган навбатдан ташқари парламент сайловларида Сербия прогрессив партияси (SNS) бошчилигидаги «Александар Вучич Сербия тўхтатмаслиги керак» коалицияси ғалаба қозонганини эълон қилди. «127 мандатга эга бўлган ҳолда биз парламентда мутлақ кўпчилик бўламиз», дея Вучичнинг сўзларини келтирган AFP.

Шу билан бирга, CeSID ва Ipsos жамоатчилик фикрини ўрганиш институтлари маълумотларига кўра, бюллетенларнинг 80 фоизи санаб чиқилгач, Вучич коалицияси 46 фоиз овоз тўплагани аниқланган. Бу Сербияда 19 ой аввал бўлиб ўтган сўнгги парламент сайловларига қараганда икки фоизга кўпдир. Кузатувчилар таъкидлашича, агар бу натижа сақлаб қолинса, Вучич блоки Сербия халқ ассамблеясида (бир палатали парламент) кўпчилик ўринни қўлга киритиб, ўзига 250 мандатдан 115 тасини кафолатлаши мумкин.

Иккинчи ўринда - «Сербия зўравонликка қарши» мухолифат гуруҳи. Хабар эълон қилинган пайтда у 23 фоиз овоз тўплаган, бу унга парламентда камида 57 ўрин олиш ҳуқуқини беради.

Ассамблея аъзолари тўрт йилга сайланади. Республика сайлов комиссияси маълумотларига кўра, жорий сайловларда 6,5 миллион киши овоз бериш ҳуқуқига эга.

Вучич 2023 йил 1 ноябрда «зўравонлик тарғиботига» қарши оммавий норозилик намойишлари фонида халқ ассамблеясини тарқатиб юборганидан сўнг Сербияда муддатидан олдин парламент сайловлари тайинланган эди.

«Александар Вучич - Сербия тўхтамаслиги керак» блоки

Сербия прогрессив партияси - «Александар Вучич - Сербия тўхтамаслиги керак» блокидаги асосий куч. 2014 йилдан бери SNS’ни Вучич бошқариб келмоқда, аммо 2023 йил май ойида у ушбу сиёсий куч раҳбари лавозимидан расман истеъфога чиққан. Ундан ташқари блокка қуйидагилар киради: пенсионерлар партияси, иккита «деҳқонлар» партияси, иккита социал-демократик партия ҳамда яна бир қанча консерватив партиялар ва ҳаракатлар.

Сербиядаги навбатдан ташқари парламент сайловлари олдидан айрим кузатувчилар Россия сайлов кампаниясида, жумладан, оммавий ахборот воситаларида ташвиқот орқали фаол иштирок этаётганига эътибор қаратган.

Сербияда 17 декабр куни 60 дан ортиқ шаҳар ва қишлоқларда мэр сайловлари ҳам бўлиб ўтди, парламент сайловлари эълон қилинганидан кейин маъмуриятлар раҳбарлари истеъфога чиқди.