Андижон шаҳридаги кўп қаватли уйлардан бирида ёнғин чиқди. Оқибатда бир киши ҳалок бўлди, яна бир киши жароҳатланди. Ёнғинга газ-ҳаво аралашмасининг чақнаши сабаб бўлган.
Фото: Видеодан кадр
2 феврал куни Андижон шаҳри Иқбол маҳалласидаги 39-кўп қаватли уйнинг 61-хонадонида ёнғин содир бўлди, деб хабар бермоқда Андижон вилояти Фавқулодда вазиятлар бошқармаси матбуот хизмати.
Шу куни соат 18:13 да хонадонда газ-ҳаво аралашмасининг чақнаши сабабли ёнғин юзага келгани тўғрисида бошқармага хабар келиб тушган.
Воқеа жойига 3 та ёнғин-қутқарув экипажлари соат 18:18 етиб борган, ёнғин соат 18:21 да тўлиқ қуршаб олинган, соат 18:27 да батамом ўчирилган.
Ёнғин оқибатида бир нафар фуқаро вафот этган, яна бир киши жароҳат олган.
Вазият ФВВ раҳбарияти томонидан тўлиқ назоратга олинди, дейилади хабарда.
