АҚШ Россияга қарши энг жиддий санкцияларни жорий этишдан қочади — ОАВ

Қўшма Штатлар санкциялар ортидан ўз иқтисодиётига таъсир кўрсатиши мумкин бўлган жиддий зарбалардан қўрқиши таъкидланмоқда.

Фото: РИА Новости

АҚШ расмийлари Россияга қарши энг жиддий санкцияларни киритишдан қочмоқда. Бунга Bloomberg эътибор қаратди.

Нашр маълумотларига кўра, санкцияларнинг кенг кўламли рўйхатида металлургия соҳаси йўқ. Шунингдек, энергетика секторига нисбатан санкциялар кучайтирилмаяпти, банкларга нисбатан эса иккиламчи санкциялар киритилмаяпти.

Журналистларнинг фикрича, бу эҳтиёткорлик АҚШ президенти Жо Байденнинг жамоаси ҳали ҳам Россия иқтисодиётига путур етказиши мумкин бўлган даромад оқимлари билан шуғулланишни истамаслигини акс эттиради.

«Улар санкциялар ортидан АҚШ иқтисодиётига таъсир кўрсатиши мумкин бўлган жиддий зарбадан қўрқади», деб ҳисобламоқда журналистлар.

Нашрнинг таъкидлашича, Россияга технология ва материалларни сотиб олишга, шунингдек, бойитилган уран, алюминий ва никел каби металлар савдосига ёрдам берадиган хорижий банкларга қарши жиддий чоралар кўриш мумкин эди. Бундан ташқари, АҚШ Россия ҳукуматининг музлатилган активларини ҳам қўлга киритиши мумкин. Аммо журналистлар таъкидлаганидек, бу чораларнинг барчаси жиддий хавф билан боғлиқ.

«Россияга чинакам таъсир кўрсатиш учун биз бутун жаҳон иқтисодиёти учун зарарли оқибатларга олиб келиши мумкин бўлган кўпроқ стратегик ҳаракатларни амалга оширишимиз керак... Биз янада қийинроқ қарорлар қабул қилишни бошлашимиз ва бу қарорлар билан бирга келадиган оқибатларни ҳам қабул қилишимиз керак», деб ҳисобламоқда АҚШ Молия вазирлигининг собиқ ходими Ким Донован.

23 феврал куни АҚШ президенти Жо Байден Украинага қарши уруш ва россиялик мухолифатчи Алексей Навалнийнинг ўлими туфайли Россияга қарши 500 дан ортиқ янги санкциялар киритганини маълум қилди.

20 февралда эса Европа Иттифоқи Украина ҳудудларининг ноқонуний аннексия қилиниши муносабати билан Россияга нисбатан жорий этилган чекловчи чораларни бир йилга — 2025 йил 24 февралгача узайтирди.