Салехард суди Навалнийнинг онаси шикоятини рад этди

Салехард суди Людмила Навалнаянинг терговчилар ҳаракатсизлиги ҳақидаги шикоятини кўриб чиқмасдан қолдирди. Бу ҳақда 4 март, душанба куни ФБК директори Иван Жданов ўзининг Telegram-каналида маълум қилди.

Алексей Навалнийнинг тарафдори таъкидлашича, бу шикоят мухолифатчи сиёсатчи онаси томонидан юборилган, чунки хавфсизлик кучлари сиёсатчи жасадини бир неча кун давомида қариндошларига беришдан бош тортган. 

Навалнийнинг ўлими юзасидан терговдан олдинги текширув давом этмоқда. «Бу текширув ҳеч нарса билан тугамаслиги аниқ, аммо адвокатлар жиноят ишини қўзғатишдан бутунлай воз кечиш ва бу рад этиш устидан шикоят қилиш даражасига қадар барча расмий тартиб-қоидаларни олиб боради. Эртами-кечми ҳақиқий тергов ўтказилади», - дея ёзган Жданов. 

Алексей Навалнийнинг ўлими 

Узоқ муддатли қамоқ жазосига ҳукм қилинган Алексей Навалний 16 феврал куни Ямал-Ненец автоном округи Харп қишлоғидаги «Полярный волк» махсус режимли колониясида вафот этди. Унинг ўлими ҳақидаги ҳисоботда айтилишича, 47 ёшли сиёсатчи «табиий сабаблар» туфайли вафот этган. ФБК яратувчисининг тарафдорлари у ўлдирилган деб ҳисоблаяпти. Навалний қамоқда ўтирган вақтида 27 марта жазо камерасига жўнатилган. 
 
Алексей Навалнийнинг жасади онаси Людмила Ивановнага фақат 24 феврал куни берилди. Бундан олдин у Навалний билан хайрлашмасдан яширин дафн маросимига розилик беришни талаб қилган Тергов қўмитасининг ултиматумидан шикоят қилган. Людмила Навалная бу талабни бажаришдан бош тортди. Навалнийнинг дафн маросими 1 март куни Москвада, Борисов қабристонида бўлиб ўтди. Ҳибсга олиш таҳдидларига қарамай, минглаб одамлар сиёсатчи билан хайрлашиш учун келган. Дафн маросимидан бир неча кун ўтгач ҳам одамлар сиёсатчининг қабри олдига гул қўйиш ва у билан хайрлашиш учун навбатда турибди.