Франция «Крокус Сити»даги фожиадан кейин терактлар содир этилишидан хавотирда

Москва вилоятида содир бўлган теракт фонида Франция террорчилик таҳдиди хавфининг энг юқори даражасини эълон қилди. Бу ҳақда 24 март, якшанба куни бош вазир Габриэл Аттал X ижтимоий тармоғида маълумот берди.

Унга кўра, Франция президенти Эммануэл Макрон Елисей саройида мамлакат Мудофаа ва миллий хавфсизлик кенгашини чақиртирди. Аттал учрашувга сабаб сифатида 22 март куни Москва яқинидаги Красногорск шаҳрида «Крокус Сити Холл» концерт залида содир бўлган терактни келтирган. 

«ИШИД ҳужум учун масъулиятни ўз зиммасига олгани ва мамлакатимизга қилинаётган таҳдидларни инобатга олиб, биз Вижипиратни (террор таҳдиди миллий тизими) энг юқори даражага - «ҳужумга фавқулодда тайёрлик» даражасига оширишга қарор қилдик», - дейди Аттал. 

Вижипират бешта террористик огоҳлантириш даражасини ўз ичига олади, бунда ҳеч қандай таҳдид кутилмайдиган «оқ»дан энг юқори «бинафша»гача даража назарда тутилган. Энг юқори даража мамлакатда бир қатор террорчилик ҳаракатларини, шу жумладан «ноанъанавий» усулларни қўллаш хавфини англатади. Ушбу таҳдид даражаси жорий этилганда, ҳокимият тегишли идораларга террорчилик ҳужумларининг олдини олиш учун жамоат ҳаётига зарар етказадиган чораларни қўллашга рухсат беради. 

Францияда Вижипиратнинг максимал даражаси сўнгги бор 2023 йил октябр ойи ўрталарида, ҲАМАСнинг Исроилга ҳужумидан кейин Яқин Шарқда можаро кучайиши билан боғлиқ «антисемитизм ҳаракатлари» фонида содир бўлди. Ўшанда Франция шимолида 20 ёшли чеченистонлик Аррас шаҳрида мактаб ўқитувчисини пичоқлаб ўлдирган ва шундан сўнг мамлакатни транспорт тармоғи объектлари, мактаблар ва маданият марказлари миналаб қўйилгани ҳақида ёлғон хабарлар тўлқини қамраб олган эди.  

Париж ОЎ очилишида томошабинлар сонини камайтиради

Март ойи бошида Politico нашри Макрон 26 июл куни Парижда бўлиб ўтадиган Олимпиада ўйинларининг очилиш маросимида томошабинлар сонини камайтиришга буйруқ бергани ҳақида ёзган эди. Газетага кўра, ўша пайтда мамлакат разведка хизматлари 2024 йилги Олимпиада ўйинлари пайтида терактлар содир этиш хавфини қайд этмаган, аммо хавотир билдирган. Франция Ички ишлар вазирлигининг фикрича, бир қатор террористик гуруҳлар, жумладан, ИШИД ва «Ал-Қоида» мамлакатни бўлажак ҳужумлар учун эҳтимолий нишон сифатида кўради, бироқ уларнинг хориждан ташкил этилишига «молиявий имкониятлар» етишмаслиги тўсқинлик қилмоқда. 

Париждаги Олимпия ўйинларининг очилиш маросими, одатда, бундай тадбирларда бўлгани каби, стадион ичида эмас, балки очиқ майдонда бўлиб ўтади - у Сена қирғоғида ўтказилади. 

Германия ҳам ИШИД ҳужумларидан хавотирда 

Воқеа учун жавобгарликни ИШИД террорчилик гуруҳи ўз зиммасига олганига қарамай, Россия махсус хизматлари «Крокус Сити Холл»га уюштирилган ҳужумда «Украина изи» версиясини тарқатмоқда.

Германия ички ишлар вазири Нэнси Фезернинг қайд этишича, Берлин Москва вилоятидаги теракт ИШИД томонидан уюштирилган деган версиядан келиб чиқмоқда. Фезернинг таъкидлашича, ИШИД жангарилари ҳозирда Германия учун «энг катта таҳдид»дир. 

Бундан ташқари, 19 март куни Германия Федератив Республикаси Федерал прокуратураси Гера шаҳрида (Тюрингия федератив ери) ИШИД гуруҳига аъзо бўлган икки шахсни ҳибсга олди. Афғонистонликлар Швеция парламентига ҳужум уюштиришни режалаштирганликда гумон қилинмоқда.