АҚШ ва Украина хавфсизлик кафолатлари тўғрисидаги битимни имзолади

Қўшма Штатлар Украинанинг суверенитети ва ҳудудий яхлитлигини ҳимоя қилишни қўллаб-қувватлашини яна бир бор тасдиқлади.

Фото: Reuters

АҚШ президенти Жо Байден ва Украина етакчиси Володимир Зеленский икки давлат ўртасида хавфсизлик кафолатлари тўғрисидаги 10 йиллик битимни имзолади, деб хабар берди Reuters.

«Томонлар ушбу келишувни Украинанинг НАТО иттифоқига аъзо бўлиши учун кўприк сифатида тан оладилар», дейилади хабарда.

Натижада, энди Украина «Катта еттиликка» (G7) кирувчи барча давлатлар, бундан ташқари, яна 8 та давлат билан шундай битимга эга бўлди.

АҚШ билан келишувда айтилишича, Украинага қуролли ҳужум ёки қуролли ҳужум таҳдиди юзага келган тақдирда, АҚШ ва Украинанинг юқори мартабали расмийлари жавоб чоралари бўйича маслаҳатлашиш ва Украинага қўшимча мудофаа зарурлигини аниқлаш учун 24 соат ичида учрашади.

Келишувга кўра, Қўшма Штатлар Украинанинг суверенитети ва ҳудудий яхлитлигини ҳимоя қилишни қўллаб-қувватлашини яна бир бор тасдиқлайди.

Қайд этилишича, Қўшма Штатлар суверен, мустақил, демократик Украинани ҳимоя қилишга қодир бўлган Украина хавфсизлик ва мудофаа кучларини ривожлантириш ва келажакдаги тажовузнинг олдини олиш учун узоқ муддатли моддий, ўқув, маслаҳат, разведка, хавфсизлик, мудофаа-саноат, институционал ва бошқа ёрдам кўрсатиш ниятида.

Аввалроқ, Украина 14 та давлат, жумладан Буюк Британия, Франция, Германия, Италия, Канада, Испания, Белгия, Нидерландия, Дания, Швеция, Финляндия, Латвия, Эстония ва Япония билан хавфсизлик кафолатлари тўғрисидаги битимни имзолаган эди.