Германия «Охматдет»ни қайта тиклаш учун 10 млн евро ажратади

Германия 8 июл куни Россия ҳужуми натижасида қисман вайрон бўлган Киевдаги «Охматдет» касалхонасини тиклаш учун Украинага 10 миллион евро ажратмоқда. «Биз Украинада саратон касаллигига чалинган болалар учун бу шифо маскани энди йўқлигини қабул қилмаслигимиз керак ва қабул қилмаймиз», деди Германиянинг иқтисодий ҳамкорлик ва ривожланиш вазири Свеня Шулце чоршанба, 17 июл куни чоп этилган Rheinische Post газетасига берган интервюсида.

Ажратилган пуллар бошқа донорлар ва ҳисса қўшувчилар маблағлари билан биргаликда шифохонани тезда иш ҳолатига келтириш ва бинони қишда фойдаланишга тайёрлашга йўналтирилади. Гап, хусусан, шифохона фасадлари, даволаш хоналарини таъмирлаш ва техник хизмат кўрсатиш, шунингдек, электр ва иссиқлик таъминоти ҳақида бормоқда, дейилади нашрда. 

Шулце сўзларига кўра, болалар шифохонасининг вайрон бўлиши «Россия бу урушни қанчалик шафқатсиз ва ғайриинсоний олиб бораётганини» кўрсатади. Вазир қўшимча қилишича, Россиянинг Украинага кенг кўламли ҳужумидан болалар «энг кўп» азият чекмоқда. 

БМТ: «Охматдет»га катта эҳтимол билан Россия ракетаси келиб урилган 

Киевдаги «Охматдет» болалар касалхонасига «катта эҳтимол билан» тўғридан тўғри Россиянинг Х-101 ракетаси келиб урилган. Бундай хулосага БМТнинг Инсон ҳуқуқлари бўйича бошқармаси мутахассислари келган, улар видеоёзувларни таҳлил қилиб, етказилган зарарни бевосита жойида ўрганган.

Сўнгги маълумотларга кўра, «Охматдет»га қилинган ҳужум натижасида икки киши ҳалок бўлган, 32 киши яраланган.

«СБУ»: Россиянинг «Охматдет»га зарбаси аниқ йўналтирилган бўлган

Украина хавфсизлик хизмати («СБУ») касалхонага зарба берилган жойда Россиянинг X-101 ракета двигатели бўлакларини аниқлади. Бундан ташқари, украиналик терговчилар X-101 бошқа деталларини топдилар, улар Россия «Охматдет»га ракетани аниқ йўналтирганини ва бу унинг йўналишидан оғиши натижаси эмаслигини исботлайди.