Россияда сенатор қотилликка тайёргарлик кўрганликда гумонланиб ҳибсга олинди

Тула вилоятидан сенатор Дмитрий Савелев пул ваъда қилиш эвазига тадбиркорни ўлдиришга тайёргарлик кўрганликда гумон қилиниб ҳибсга олинди, деб хабар берди Россия Федерацияси Тергов қўмитаси (ТҚ) расмий вакили Светлана Петренко. «Бош тергов бошқармаси россиялик сенатор Дмитрий Савелевга нисбатан қотилликка тайёргарлик кўргани учун жиноий иш қўзғатди», дейилади 2 август, жума куни департаментнинг Telegram-каналида эълон қилинган хабарда. 

Шу куни Москванинг Басманний суди тергов талабига биноан Савелевни 2 октябргача ҳибсга олди. 

Тергов маълумотларига кўра, «шахсий душманлик асосида» Савелев 2023 йил август ойида Москвада 100 минг доллар пул эвазига ўз бизнес шериги Ионовга суиқасд уюштирмоқчи бўлган, у гўёки улар биргаликда бошқарган компаниядан пулларни исроф қилган. Ўз навбатида, сенаторнинг таниши унинг топшириғи билан «қотиллик ижрочисини топишга ҳаракат қилди», бу Россия Федерацияси ҳуқуқни муҳофаза қилиш органларига маълум бўлди. 

«Жиноят буюртмачиси ва ташкилотчилари, шу жумладан қотиллик уюштиришни фош қилиш бўйича комплекс тезкор-қидирув тадбирлари ташкил этилди», деди Петренко ва тадбиркорнинг ўлдирилгани ҳақидаги маълумотни олгандан сўнг, «Савелев жиноят содир этишда шерик бўлган шахсга пул бергани»ни айтди. «Коммерсант» суҳбатдошларига кўра, россиялик сенатор жиноятни воситачилар орқали уюштирган ва улар «ФСИН» собиқ ходимини «қотил сифатида» ёллаган. Бироқ, буйруқни олгач, у «ФСБ»  билан боғланиб, кейин ходимлар назорати остида ҳаракат қилди. 

Сенаторнинг дахлсизлиги олиб ташланди, у умрбод қамоқ жазосига ҳукм қилиниши мумкин

Шу куннинг ўзида Федерация кенгашининг регламент ва парламент фаолиятини ташкил этиш бўйича қўмитаси раҳбари Вячеслав Тимченко Дмитрий Савелевдан дахлсизлик олиб ташланганини маълум қилди. «Интерфакс» агентлиги хабарига кўра, Федерация кенгаши бош прокурор талабига биноан Савелев билан тергов ҳаракатларини ўтказишга рози бўлган. Ўз навбатида, Федерация кенгашининг Конституциявий қонунчилик ва давлат қурилиши қўмитаси раҳбари Андрей Клишас Савелевга нисбатан тинтув ва ҳибсга олишга розилик берилганини айтди.

Савелевнинг ўзи Федерация кенгаши йиғилишида таъқиб қилинишини асоссиз деб атади ва унга қарши фактлар «тўқима» эканини билдирди, деди Тимченко РБК агентлигига.

Россия Федерацияси Жиноят кодексининг 105-моддаси («қотилликка тайёргарликни ташкил этиш»), 20 йилгача озодликдан маҳрум қилиш ёки умрбод озодликдан маҳрум қилиш тарзидаги жазони назарда тутади. 

Савелевнинг ўзи ким?

Нижний Новгородда туғилган 55 ёшли сенатор Дмитрий Савелев «Ягона Россия»га аъзо бўлган. У 2016 йилдан иккинчи муддатга Федерация кенгашига тайинланди. Унинг ваколатлари келаси ой тугаши керак эди. Сенатор этиб тайинланишидан олдин Савелев 15 йилдан ортиқ Давлат думаси депутати бўлган, 1990-йилларда эса «Лукойл» тузилмаларида ишлаган. «Коммерсант» ёзганидек, Савелев Россия Федерациясининг ўша пайтдаги бош вазири Сергей Кириенко ҳомийлигида «Транснефт» президенти сифатида ҳам ишлаган. 

Савелев Forbes маълумотларига кўра Россиянинг 100 нафар энг бадавлат амалдорлари рейтингига бир неча бор киритилган. 2019 йилда журнал унинг оиласи даромадини 188,5 миллион рублга, бир йилдан кейин эса 329 миллион рублга баҳолаган. 2020 йил учун мулк ва даромадлар декларациясида Савелев Британиядаги 489 квадрат метрлик уйни ҳам кўрсатди.