Германияда экофаоллар бир қатор аэропортлар ишига халақит берди

«Сўнгги авлод» радикал экологик ҳаракати аъзолари Берлин-Бранденбург, Келн-Бонн аэропортларида, шунингдек, Штутгарт ва Нюрнберг ҳаво бандаргоҳларида норозилик намойишлари ўтказди. Расмийларнинг 15 август, пайшанба куни хабар беришича, тўқ сариқ жилет кийган саккиз нафар фаолнинг ҳаракатлари натижасида ҳаво қатнови тўхтатилган.

Келн-Бонн аэропортида рейслар полиция операцияси туфайли тўхтатилди, дея аниқлик киритди аэропорт. Полиция маълумотларига кўра, икки фаол учиш-қўниш йўлагига ётиб олган. Ҳуқуқ-тартибот ходимларининг тахминига кўра, улар унинг ҳудудига панжарадаги тешик орқали киришган.

«Ҳозирда гап миллиардлаб инсонлар ҳаёти ҳақида кетяпти. Иқлимнинг бузилиши кўпчилик учун ҳақиқатга айланди», дея маълум қилди экологик ҳаракат. «Биз ҳали ҳам имтиёзли ҳолатдамиз ва бу ҳақда бирор нарса қила оламиз. Илтимос, OIL KILLS! акциясига қўшилинг», - деб ёзди улар. Полиция қўлга олиш жараёнини ўтказмоқда.

Экологик ҳаракати фаолларида тинтувлар

Аввалроқ, 8 август куни «Сўнгги авлод» фаолларининг Германия беш шаҳридаги саккизта манзилида тинтув ўтказилган эди. Гуруҳ вакилларининг сўзларига кўра, полиция ҳаракати OIL KILLS! («Нефть ўлдиради») акциялари билан боғлиқ бўлиб, унинг давомида ҳаракат аъзолари июл ойи охирида Германиянинг бир қатор йирик аэропортлари ишини тўхтатиб қўйганди.

Фаолларнинг аниқлик киритишича, Берлин, Фрайбург, Халл, Лейпциг ва Маннхаймда тинтувлар ўтказилиб, ДНК намуналари олинган.

Аввалроқ гуруҳнинг Австриядаги бўлими норозилик фаолиятини тўхтатаётганини маълум қилган эди.