АЭХА раҳбари Москва таклифига кўра Курск АЭСга ташриф буюради

Атом энергияси бўйича халқаро агентлик (АЭХА) бош директори Рафаэл Гросси энергетика объектига зарар етказиш хавфи ортиши сабабли Курск атом электр станцияси (АЭС)га ташриф буюради. 21 август, чоршанба куни чоп этилган Financial Times газетасига берган интервюсида Гросси келаси ҳафта Москва таклифига биноан Курскка атом электр станцияси раҳбарияти билан вазиятни муҳокама қилиш ва станцияга эҳтимолий ҳужумлар ҳақида далиллар тўплаш учун келишини айтди.

Ҳозир Курск атом электр станцияси техник жиҳатдан Украина қуролли кучлари (УҚК)нинг «артиллерияси етадиган масофада», деб таъкидлади Гросси. «Ва жанглар давом этаётганидан мен жуда хавотирдаман», дея қўшимча қилди у. АЭХА раҳбари, шунингдек, бугунги кунда Курск яқинидаги станцияда тўлиқ ишлайдиган иккита ядро реактори Чернобил АЭС реакторлари билан ўхшаш тузилишга эга эканлигини эслатди. «Реактор ядроси бутунлай очиқ, мен бир нечта бундай станцияларда бўлдим, сиз айланиб юриб, ён-атрофда ёнилғи элементларини кўришингиз мумкин», - дея тушунтирди эксперт атом электр станциясига тўғридан тўғри зарба бериш хавфини баҳолаб. 

Россия Курск АЭСда Украина ракеталари бўлаклари топилганини эълон қилган

«Росатом» 8 август куни Курск атом электр станцияси ҳудудида уриб туширилган ракеталарнинг парчалари топилгани ҳақида хабар берди. Шу билан бирга, давлат корпорацияси атом электр станцияси ва энергетика инфратузилмаси тўғридан тўғри ўққа тутилиши фактларини тасдиқламади. Аввалроқ Украина ташқи ишлар вазирлиги Украина қуролли кучлари Курск атом электр станциясига ҳужум қилишни режалаштирмагани ва ҳужум қилишни хоҳламаслигини маълум қилганди. 

Курск атом электр станцияси Курскдан 40 км ғарбда жойлашган. У Россиядаги энг йирик станциялардан бири. АЭС тўртта энергия блокидан иборат бўлиб, улардан иккитаси Украина қуролли кучларининг минтақадаги фаол ҳаракатлари фонида ишлашда давом этмоқда.