IBM компанияси Хитойдаги минглаб ходимларини ишдан бўшатади

Ўтган дам олиш кунлари IBM лабораторияларида фаолият юритувчи хитойлик мутахассислар компаниянинг ички тармоғидан узиб қўйилган.

Фото: Getty Images

АҚШнинг International Business Machines (IBM) компанияси Хитойда илмий-тадқиқот ва тажриба-конструкторлик ихтироларига оид фаолиятини якунлаб, мингдан ортиқ ходимларини ишдан бўшатмоқда, деб хабар беради SCMP.

Қайд этилишича, компания China Development Lab ва China Systems Lab лабораторияларини ёпади, шунингдек, Пекин, Шанхай ва Далян каби йирик шаҳарлардаги ходимларини ишдан бўшатади.

Jiemian нашри маълумотларига кўра, ўтган дам олиш кунлари IBM лабораторияларида фаолият юритувчи хитойлик мутахассислар компаниянинг ички тармоғидан узиб қўйилган. Ишчилар қисқартирилиши ҳақида эса бугун, 26 август куни ўтказилган йиғилишда маълум қилинган.

«IBM мижозлар манфаати учун фаолиятини мослаштиради ва бу ўзгаришлар унинг Хитой ҳудудидаги мижозларга хизмат кўрсатиш қобилиятига таъсир кўрсатмайди», — дейилади хабарда.

IBM — Хитойдаги иш ўринларини қисқартираётган трансмиллий технологик гигантлардан бири. Хитой—Америка рақобати кескинлашгани боис глобал компаниялар материкдаги ўз фаолиятини ўзгартиришга мажбур бўлмоқда.

Жорий йилда Швециянинг телекоммуникация қурилмаларини ишлаб чиқарувчи Ericson ҳамда дунёга машҳур Tesla компаниялари, бундан ташқари, Amazon ва Intel ҳам Хитойдаги иш ўринларини қисқартирган эди.

#IBM #Хитой #иш ўринлари