Иордания ва Ғарбий Соҳил чегарасидаги отишмада исроилликлар ҳалок бўлди

Иордания ва Исроил томонидан истило қилинган Ғарбий Соҳил ўртасидаги чегарада содир бўлган отишмада уч киши ҳалок бўлди. Бу ҳақда Исроил расмийлари хабар берди, деб ёзди BBC.

Бу минтақадаги кескинликни кучайтирган 7 октябр ҳодисаларидан бери Иордания чегарасида юз берган биринчи шундай можародир.

Исроил мудофаа кучлари Алленби кўпригидаги отишмада уч нафар исроиллик фуқаро ҳалок бўлганини маълум қилди. Ҳужумчи юк машинасида Иордания томондан келган, сўнгра одамларга қарата ўт очган.

Ҳайдовчи «юк машинасидан тушиб, кўприкда ишлаётган Исроил хавфсизлик кучларига қарата ўт очди», дейилади ҳарбийлар баёнотида.

Хавфсизлик кучлари ўқ отган шахсни «йўқ қилди», Исроил ҳарбийлари эса юк машинасида портловчи моддалар бор-йўқлигини текширмоқда.

Иордания расмийлари чегарани ёпганини ва ҳолат юзасидан суриштирув бошланганини эълон қилди. Исроил ҳукумати ҳам Иордания билан чегарани ёпди.

Ушбу кўприк Амман ва Қуддус ўртасида жойлашган бўлиб, Ғарбий Соҳил ва Иордания ўртасидаги ягона расмий чегара ўтиш жойидир. У орқали Исроил ҳудудидан ўтмасдан Ғарбий Соҳилга кириш мумкин. Назорат пунктида Исроил хавфсизлик кучлари билан бирга хусусий қўриқчилар ишлайди.

Исроил ва Иордания 1994 йилда тинчлик шартномасини имзолаган ва хавфсизлик бўйича ҳамкорлик қилади. Ҳар куни товар юкланган ўнлаб юк машиналари бу жойдан Ғарбий Соҳил ва Исроил бозорига юк олиб ўтади.