Исроил армияси Ливанга киришга тайёргарликни бошлади

Армия ҳарбийларни «Ҳизбуллоҳ»га қарши қуруқликдаги ҳужумга тайёрланишга чақирди.

Фото: Reuters

Исроил Мудофаа кучларининг (ЦАҲАЛ) Шимолий қўмондонлиги қўмондони генерал-майор Ори Гордин мамлакат «Ҳизбуллоҳ»га қарши ҳарбий кампаниянинг «янги босқичига» кирганини айтди. Унинг сўзларини Times of Israel келтирди.

Гордин сўзларига кўра, ҳарбийлар Ливанда жойлашган гуруҳга қарши қуруқликдаги жангларга «ҳар томонлама тайёргарлик кўриши» керак.

«Операция «Ҳизбуллоҳ»нинг имкониятларига, айниқса, унинг [ракета] имкониятларига, ташкилот қўмондонлари ва аъзоларига жиддий зарба бериш билан бошланди», деди генерал.

ЦАҲАЛ, шунингдек, Ливан билан чегарадаги вазият кескинлашуви муносабати билан резервчиларнинг икки бригадаси сафарбар этилганини эълон қилди.

23 сентябр куни ЦАҲАЛ штаб бошлиғи генерал-лейтенант Герци Ҳалеви Ливан гуруҳига қарши «огоҳлантирувчи ҳужум операцияси» бошланганини эълон қилди. Сўнгги кунларда Исроил армияси Ливан жануби ва мамлакат пойтахти Байрут ҳудудига зарбалар бермоқда. Ҳалеви «шимолдаги [Исроил] аҳолисининг уйларига қайтиши учун шароит яратиш» вазифасини белгилаб берди.

Шу куни Исроил Бош вазири Бинямин Нетаняху Ливан халқига мурожаатида Исроил армияси ливанликларга эмас, «Ҳизбуллоҳ»га қарши уруш олиб бораётганини айтди. У аҳолини ЦАҲАЛ чақириқларига қулоқ солишга ва «Ҳизбуллоҳ» қурол сақлаётган жойларни тарк этишга чақирди.