Жулиан Ассанж озод этилганидан бери илк бор омма олдида чиқиш қилади

Журналист ва WikiLeaks асосчиси Жулиан Ассанж Британия қамоқхонасидан озод этилганидан бери ўзининг биринчи оммавий чиқишни амалга оширмоқда — у кейинги ойда Европа Кенгашида кўрсатма беради. 

53 ёшли Ассанж июн ойида озод этилиши борасида келишувга эришганидан кейин Австралияга қайтган эди, у АҚШнинг жосуслик тўғрисидаги қонунини бузиш борасидаги айбини тан олган ва натижада, унинг Буюк Британиядаги 14 йиллик юридик курашига якун ясалган. Ассанж кўплаб айбловлар илгари сурилган АҚШга депорация қилиниши мумкин эди.

Қаттиқ тартибли Лондон қамоқхонасида сақланган вақтида уйланган рафиқаси Стелланинг маълум қилишича, Ассанжга ўз соғлиғини тиклаши ва ҳибсдан кейин ҳаёлларини жойига қўйиб олиши, шунингдек, қамоқхонадан ташқарида ҳеч қачон кўрмаган икки фарзанди билан вақт ўтказиши керак.

Энди у омма олдида чиқиш қилиб, 1 октябр куни Страсбурга бўлиб ўтадиган Европа Кенгаши Парламент ассамблеясининг Юридик масалалар ва инсон ҳуқуқлари бўйича қўмитасида кўрсатма беради.

Ассанж 175 йилга қамалиши мумкин эди

Жулиан Ассанж 24 июн куни 5 йил ўтирган Лондоннинг «Белмарш» қаттиқ тартибли қамоқхонасини тарк этганди. Журналист АҚШ Адлия вазирлиги билан келишувга эришгач, қўйиб юборилган. 

Қўшма Штатларда Ассанжга «АҚШ тарихида махфий маълумотларни ошкор қилиш бўйича энг йирик иш билан боғлиқ жиноятлар» юзасидан 17 та айблов қўйилган. Гап 2010 йилдан бери АҚШнинг ҳарбий ва дипломатик фаолиятига оид 700 мингга яқин махфий ҳужжатлар ошкор этилгани ҳақида бормоқда. Ҳужжатларда АҚШнинг Ироқ ва Афғонистондаги ҳарбий ҳаракатлари, жумладан, тинч аҳоли ўлдирилиши ва америкалик ҳарбийларнинг маҳбусларга нисбатан шафқатсиз муносабати ҳақида маълумотлар бор. Журналист 175 йилга қамалиши мумкин эди.