Россиялик собиқ телебошловчи Фарида Қурбонгалеева халқаро қидирувга берилди

«Россия 1» телеканалидаги «Вести» дастурининг собиқ бошловчиси Фарида Қурбонгалеева халқаро қидирувга берилди. Бу ҳақда 9 октябр, чоршанба куни ўз ихтиёридаги ҳужжатларга таяниб, «РИА Новости» давлат агентлиги хабар берди.

«Қурбангалеева ва бошқа номаълум шахсларга нисбатан 2024 йил 11 май куни жиноят иши қўзғатилган», — дея қўшимча қилди агентлик. Россия Ички ишлар вазирлиги журналистни 20 июн куни қидирувга берган. «Медиазона» аввалроқ хабар берганидек, у билан бирга бу ишда «Россия озодлиги» легиони кўнгиллиси Алексей Барановский ҳам иштирок этмоқда.

Бошловчи аллақачон «чет эл агенти» мақомига эга

Аввалроқ Фарида Қурбонгалеева Россияда «чет эл агенти» деб эълон қилинган ва Росфинмониторинг томонидан тузилган «террорчилар ва экстремистлар» рўйхатига киритилган эди. У «терроризмни оқлаш» учун оммавий чақириқлар ва «миллий адоват асосида» Россия армияси ҳақида «фейк» маълумотларни тарқатишда айбланмоқда. Москванинг Замоскворецкий суди журналистни Россия ҳудудида амалда ушлаб турилган пайтдан бошлаб икки ой муддатга ҳибсга олишга ёки экстрадиция ёки депортация қилинган тақдирда Россия ҳуқуқни муҳофаза қилиш органларига топширишга қарор қилди.

Фарида Қурбонгалеева 2007 йилдан 2014 йилгача «Вести» дастури бошловчиларидан бири бўлган, бироқ Қрим Россия томонидан қўшиб олинганидан сўнг дарҳол бу лавозимдан кетган. 2018 йилдан бери у Прагада яшаб, ишлайди. 2018 йилдан 2021 йилгача Қурбонгалеева «Настоящее время» телеканалида ишлаган ва ҳозирда ўзининг «Прага дўли» Telegram каналини бошқаради.

Қурбонгалеева: Ўз ишимни бажаришда давом этаман

«Бу (халқаро қидирувга бериш) ёзда, менга террорчи ва экстремист мақоми берилгандан сўнг содир бўлган деб ўйлагандим, аммо энди маълум бўлди», — деб ёзди Фарида Қурбонгалеева Facebook ижтимоий тармоғидаги саҳифасида ва ўз Telegram-каналида. Унинг таъкидлашича, украиналиклар ёки россиялик сиёсий маҳбуслар бошдан кечираётган «даҳшатнинг кичик қисмини» ҳам бошдан кечирмаган.

«Шундай қилиб, мен ўз ишимни бажаришда давом этаман, барчамизга ўз кучимизни Украинани қўллаб-қувватлашга йўналтиришни таклиф қиламан», — дея хулоса қилди журналист.