БМТ Исроилни Ливандаги қароргоҳига ҳужум қилишда айблади

Бирлашган Миллатлар Ташкилоти 10 октябр, пайшанба куни Исроилни БМТнинг Ливандаги муваққат кучлари штаб-квартираси (UNIFIL) ва БМТ миссиясининг мамлакат жанубидаги бошқа иккита объектига ҳужум уюштирганликда айблади. Оқибатда Индонезия фуқаролари яралангани айтилмоқда. Исроил томони бу маълумотга ҳозирча изоҳ бермади.

БМТ маълумотларига кўра, яраланганлар Нақура шаҳридаги UNIFIL кузатув минорасидан Исроилнинг «Меркава» танки томонидан ўққа тутилганидан кейин қулаган. Ҳозир иккаласи ҳам касалхонада, ҳаётлари хавф остида эмас. Баёнотда, шунингдек, Исроил ҳарбийлари UNIFIL'нинг бошқа позицияларига ҳам ҳужум қилгани қайд этилган. Оқибатда транспорт воситалари ва алоқа тизимларига зарар етган, бироқ ходимлардан жабрланганлар йўқ.

Италия мудофаа вазири Гидо Кросетто воқеани «қабул қилиб бўлмас» деб атади ва Исроилнинг Римдаги элчиси билан фавқулодда музокаралар ўтказди. UNIFIL миссиясида қатнашаётган 10 минг аскардан минг нафари италияликдир. Ирландия бош вазири Саймон Харрис тинчликпарвар кучларга қилинган ҳужумларни «қабул қилиб бўлмас» деб атади. Ирландия ҳарбийлари ҳам БМТнинг Ливандаги муваққат кучлари таркибига киради.

6 октябр куни UNIFIL Исроилнинг ўз тинчликпарвар кучларини Ливан жанубидаги Исроил мудофаа кучлари (ЦАҲАЛ) «Ҳизбуллоҳ» ҳаракати жангчиларига қарши курашаётган ҳудуддан кўчириш таклифини рад этгани маълум бўлди.

Яқин Шарқда можаронинг кучайиши

Яқин Шарқдаги вазият 2023 йил 7 октябрда кескин ёмонлашди. Европа Иттифоқи ва АҚШ томонидан террорчи ташкилот сифатида тан олинган Ҳамас ҳаракати Исроилга қарши кенг кўламли ҳужум уюштирди. Исроилга йирик ракета ҳужуми амалга оширилди, унинг ҳудудига бостириб кирилди ва замонавий Исроил давлати тарихида тинч аҳолига нисбатан энг йирик ҳужум рўй берди, 1200 га яқин одам ҳалок бўлди. Шунингдек, жангчилар 250 га яқин одамни гаровга олиб, Ғазо секторига олиб кетишган. Гаровга олинганларнинг баъзилари алмаштирилди ёки қўйиб юборилди, бошқалари эса вафот этди.

Исроил бунга жавобан Ҳамасга қарши уруш эълон қилди. Ҳамас назоратидаги Соғлиқни сақлаш вазирлиги маълумотларига кўра, қуруқликдаги операция ва Ғазо секторини бомбардимон қилиш натижасида 42 мингга яқин фаластинлик ҳалок бўлган. Фаластинлик жангчиларни Германия, АҚШ, Исроил ва қатор араб давлатларида террорчи ташкилот сифатида тан олинган Ливаннинг «Ҳизбуллоҳ» ҳаракати қўллаб-қувватлаган. «Ҳизбуллоҳ» мунтазам равишда Ливандан Исроилга қарата ўқ узади.

2024 йил сентябр ойининг иккинчи ярмида Исроил «Ҳизбуллоҳ»га қарши ҳарбий операция бошлаганини эълон қилди. Исроил ҳаво ҳужумлари натижасида гуруҳнинг бир қанча етакчилари, жумладан, унинг етакчиси Ҳасан Насруллоҳ йўқ қилинди. Сентябр ойи охирида ЦАҲАЛ Ливан жанубида «чекланган қуруқликдаги операция»ни бошлади.

БМТ маълумотларига кўра, 100 мингга яқин ливанлик Исроил ҳаво ҳужумларидан сўнг қўшни Сурияга қочган.