Германияда Алишер Усмоновга нисбатан тергов тўхтатилди

Германиянинг Франкфурт шаҳри суди россиялик олигарх Алишер Усмоновга нисбатан пул ювиш иши бўйича терговни тўхтатди. Бу ҳақда унинг адвокатларига таяниб, Reuters агентлиги хабар берди.

«Биз доим ўз мижозимизнинг айбсиз эканини таъкидлаб келганмиз», — дейди Wannemacher & Partner юридик фирмаси адвокатлари. Улар мазкур воқеани 71 ёшли Усмоновнинг обрўсини ҳимоя қилишдаги муҳим қадам деб атади.

Bloombergʼнинг миллиардерлар индекси маълумотларига кўра, Алишер Усмоновнинг бойлиги ҳозирда 14,4 миллиард долларни ташкил этади. Унинг адвокатларига кўра, 2,5 йилдан ортиқ давом этган тергов унга қарши айбловлар, жумладан, пул ювишга оид айбловни исботлай олмаган.

Усмонов Европа судларида ўзини муваффақиятли ҳимоя қилмоқда. Март ойида Ҳамбург суди Forbes нашрига олигарх Владимир Путиннинг «яқин одами» экани ва «унинг бизнес муаммоларини ҳал қилгани» ҳақида маълумот тарқатишни тақиқлаган эди. Шу билан бирга, кейинчалик, унинг адвокатлари Германия Федерал жиноят полицияси бошқармаси ва швед иқтисодчиси Андерс Ослунднинг Усмонов ва унинг синглиси Гулбаҳор Исмоилова ҳақидаги твитларини ўчиришга эришгани маълум бўлди.

Октябр бошида Ҳамбург шаҳри суди россиялик олигарх Алишер Усмоновнинг Халқаро қиличбозлик федерацияси (FIE) ҳакамларига пора бергани ҳақидаги маълумотларни тарқатишни тақиқлади.

Алишер Усмонов 2022 йилнинг февралида Европа Иттифоқи санкциялари остига тушган эди. Ўша йилнинг кузида Мюнхен прокуратураси ЕИ томонидан жорий этилган чекловларга терс ўлароқ, бизнесмен ўзининг Германиядаги мол-мулкларига қараб туриш учун қўриқлаш фирмасига тўлов қилгани ҳақида баёнот берган эди. Германиянинг турли шаҳарларида бизнесменга тегишли деб қараладиган кўчмас мулк объектларида тинтувлар ўтказилган. 2023 йилнинг май ойида Франкфурт шаҳридаги Ер суди тинтув учун берилган бу ордерлар ноқонуний бўлгани, чунки «ҳеч нарса билан мустаҳкамланмаган фаразлар» асосида берилгани тўғрисида қарор чиқарганди.