Зеленский РФ билан хавфсизлик кафолатларисиз сулҳ тузишни рад этди

Украина президенти Володимир Зеленский Украинанинг Россия билан мудофаа урушида хавфсизлик кафолатларисиз ўт очишни тўхтатишни бемаънилик деб атади. У 7 ноябр, пайшанба куни Венгрия пойтахти Будапештда бўлиб ўтган матбуот анжуманида: «Ўт очишни тўхтатиш урушда иштирок этаётган давлат, айниқса жабрланувчи бўлган давлат хавфсизлик кафолатларини олишини билганида келади», деди. Зеленский Европа сиёсий ҳамжамиятининг саммитида иштирок этди.

Зеленский, шунингдек, Украинани НАТОга қабул қилишдан бош тортиш ва шу билан бирга, масалан, Венгрия бош вазири Виктор Орбан сингари, ўт очишни тўхтатишни талаб қилишни ҳам бемаънилик деб ҳисоблади. «Ўт очишни тўхтатишни таклиф қилган, лекин хавфсизлик кафолатларига қарши чиққан етакчи шунчаки қуруқ гап билан чекланди», деди Зеленский.

DW томонидан унинг хавфсизлик кафолатларисиз ўт очишни тўхтатишнинг иложи йўқлиги ҳақидаги далилларига етакчилар қандай жавоб бергани ҳақидаги саволига Зеленский шундай деди: «Менимча, улар жавоб бермаётганга ўхшайди».

«Хавфли риторика»

Зеленский Киев учун хавфсизлик кафолатларисиз Украинадаги урушда ўт очишни тўхтатиш талабларини «жуда хавфли риторика» деб атади. «Менимча, бугун ўт очишни тўхтатиш ҳақидаги риторика «Аввал ўт очишни тўхтатинг, кейин кўрамиз» дегандек бўляпти. Бу нарсани талаб қиладиган кимсизлар ўзи? Сизларнинг болаларингиз ҳалок бўлиб, сизларнинг уйларингиз вайрон бўляпти? Нималар деяпсизлар ўзи?» — дея ғазабини яшира олмаган Украина президенти.

Унинг таъкидлашича, Россия 2014 йилдан бери Донбассдаги ўт очишни тўхтатиш режимидан фақат кенг кўламли босқинга тайёргарлик кўриш учун фойдаланган. «Бу Украина оккупациясини давом эттиришга олиб келади ва Украина суверенитетини йўқ қилади. Буни фақат «диван мутахассислари» талаб қилиши мумкин, улар урушни фақат китоблар ва филмлардан билишади. Йиллаб ёки ойлаб Путин билан мулоқот қилиб, уни қучоқлаётган, лекин у билан ҳеч қачон жанг қилмаган одамлар. Бу уруш, унинг оқибатлари ва хавф-хатарларини чуқур тушунмаган ҳолда таҳлил қилишдир», — деди Зеленский.

Доналд Трамп ҳақида

Украина президенти АҚШнинг янги сайланган президенти Доналд Трамп ҳақиқатан ҳам уруш тезроқ тугатилишини исташига ишонч билдирди, бироқ «тезкор ечим» Украина учун йўқотишлар бўлишини таъкидлади.

«Урушнинг яқин орада тугаши ҳақида. Мен ишонаманки, президент Трамп ҳақиқатан ҳам муаммони тезда ҳал қилишни хоҳлайди, мен бу борадаги ғоядан хабарим йўқ, биз бу ҳақда президент Трамп билан гаплашмадик, менимча, у ва унинг жамоаси маълум таклифларга тайёргарлик кўряпти, буларнинг ҳаммаси олдинда. У ҳақиқатан ҳам урушни тезроқ тугатишни хоҳлаётгани аниқ. Бироқ шунчаки тез тугатиш бўлса, унда бу Украина учун йўқотишларни англатади. Балки биз бирон ниманидир кўрмаётгандирмиз, тушунмаётгандирмиз. Шунақаси ҳам бўлиб туради», — деди у.

Шу билан бирга, Зеленский уруш ҳақиқатан ҳам тезда тугатилиши мумкинлигига шубҳа билдирди. «Бу шундай бўлади дегани эмас. Мен шунчаки вазият қандай эканини айтмоқчиман. Биз россияликлар билан уришяпмиз ва бу факт. Бу асрнинг энг қийин душмани», — дейди у. РФ раҳбарияти Украинани парча-парча қилмоқчи эканлигини таъкидлаган Зеленский Украина урушнинг адолатли якунланишини исташини айтди.