Литва консерваторлари партияси аъзоси РФга жосусликда гумонланмоқда

Литва Бош прокуратураси «Ватан иттифоқи – Литва христиан демократлари» консерватив партияси аъзоси томонидан Россия фойдасига жосуслик қилингани ҳақидаги иш бўйича дастлабки терговни якунлади. Бу ҳақда 9 декабр, душанба куни Delfi портали Уюшган жиноятчилик ва коррупцияни тергов қилиш департаменти катта прокурори Артурас Урбялиснинг баёнотига асосланиб хабар берди.

«Дастлабки тергов жорий йилнинг январ ойида, разведка хизматлари маълумотларига кўра, Россия ГРУга ёлланган ва маълумот берган ва ушбу разведка ташкилоти билан ҳамкорлик қилган шахс аниқлангандан кейин бошланган», деди Урбялис ва дастлабки тергов «энг қийинларидан бири» бўлганини қўшимча қилди.

«Фуқарога сиёсий майдонни ҳам, мудофаа, НАТО йиғилишларига тайёргарлигимизни, яъни ҳам сиёсий, ҳам иқтисодий маълумот, барча мумкин бўлган разведка маълумотларини кузатиш топширилган», — деди прокурор. Литва расмийлари гумонланувчини разведка тармоғи дастури асосида ишлаган, деб ҳисобламоқда.

Прокуратура маълумотларига кўра, Россия ГРУ гумонланувчи билан 2018 йилгача махфий ҳамкорлик бўйича келишиб олган, деб ёзади Delfi. Шу билан бирга, гумонланувчи махфий бўлмаган, аммо «Россия учун қизиқиш ва аҳамиятга эга» маълумотларни тўплаган», деб хабар берди идора. Прокуратура гумонланувчининг исм-шарифини ошкор қилмади ва иш ҳали судга топширилмади.

Партия коалиция етакчиларидан бири эди

«Ўйлайманки, гап партия коалиция етакчиларидан бири бўлган ва ҳокимият тепасида бўлган давр ҳақида кетмоқда. Шубҳасиз, у партия фаолиятига алоқадор бўлган раҳбарлар ва ҳукумат амалдорлари билан учрашиши мумкин эди ва биз буни истисно эта олмаймиз. Бу ҳатто ҳукумат раҳбарлари ва вазирларга ҳам тегишли бўлиши мумкин», — дея тахмин қилди Артурас Урбялис.

«Ватан иттифоқи – Литва христиан демократлари» партияси LRT порталига бу хабар кутилмаган бўлганини билдирди. Партиянинг муваққат раиси Радвиле Моркунайте-Микуленега кўра, ҳуқуқ-тартибот идораларидан партия ичида жосуслик билан боғлиқ эҳтимолий ҳолат ҳақида ҳеч қандай сигнал бўлмаган.