Россия флоти замонавий атом сувости кемасига эга бўлди

К-564 «Архангелск» атом сувости кемаси «Оникс», «Калибр» ва «Циркон» ракеталарини жойлаштириш мумкин бўлган 8 та вертикал шахтага эга.

Фото: mil.ru

Янги, кўпмақсадли К-564 «Архангелск» атом сувости кемаси Россия денгиз флоти таркибига кирди. Бу ҳақда ТАСС хабар берди.

К-564 атом сувости кемаси 885М «Ясен-М» лойиҳасининг тўртинчи кемаси ва Архангелск шаҳри номидаги учинчи атом сувости кемаси бўлди.

Сувости кемаси қурилиши 2015 йил март ойида бошланди. У 2023 йил 29 ноябрда сувга туширилди. Шу йилнинг 11 июн куни кема денгиздаги синовларни бошлади.

«Архангелск» - кўпмақсадли, 4-авлод (энг замонавий) сувости кемаси ҳисобланади. Унинг узунлиги 130 м, экипаж сони 64 кишини ташкил қилади. У 533 мм калибрли 10 та торпедо аппаратига эга. Шунингдек, кемада «Оникс», «Калибр» ва «Циркон» ракеталарини жойлаштириш мумкин бўлган 8 та вертикал шахта бор.