Ёқутистонда ҳаво ҳарорати 51 даражагача совиши кутилмоқда

Синоптиклар Ёқутистонда аҳолиси ва меҳмонларини ҳаво ҳарорати Целсий бўйича -51 даражагача тушиб кетишидан огоҳлантирди. Бундан ташқари, минтақада кучли шамол хавфи ҳам эълон қилинган.

«2025 йилнинг 1 январидан 4 январга қадар Якутск ҳамда унинг атрофида аномал совуқ кузатилади, бунда ҳаво ҳарорати нормадан 7 ва ундан пастроқ даражага тушиб кетади», — дейилади хабарда.

Прогнозларга кўра, 2 январ куни Якутскда ҳаво ҳарорати Целсий бўйича -51 даражани ташкил этиши мумкин.

Шу билан бирга, ўтган 2024 йилда Москвада ўртача ҳаво ҳарорати юқори бўлди — 8,2 даража. Ушбу кўрсаткич Россия пойтахти кузатувлари тарихидаги барча рекордларни янгилаган. Бундан олдинги рекорд 2020 йилда ўрнатилган, ўшанда ўртача ҳарорат 8 даражани ташкил этганди. Январ ва май ойидан ташқари бутун йил давомида аномал илиқ ҳаво кузатилган.

Аввалроқ синоптиклар бу йил январь ойининг биринчи ярмида Ўзбекистон ҳудуди бўйича аномал совуқ ёки аномал илиқ шароит кутилмаётгани тўғрисида хабар берганди.